Lontan lo prét té i mars toultan an gran rob. Té i apél sa "soutane", paréy sat zanfan-d’kèr. Soman "soutane" lo prét té noir épi té pli gran : sa té pran dopi anlér son pié-d’kou, té i désann kaziman zisk’atér. Kom lo prét té mét soulié, té paréy li lavé poin lo pié ditou. Taka (1) lo dé mansh anlér, sa té trap dopi zépol, té i ariv ziska son lanvér-d’min. Séfé k’ dann tout la viann lo prét, domoun té i oi arienk son boute doi ansanm son figir !
Promié débi, Tikok té trakasé. Li té a-dmandé si lo prét navé lo pié paréy tout domoun. Li narté kontan oir kansréti lo doi-d’pié Pér Intél. Soman lo pér té i tir pa zamé son soulié ; Tikok té kit po sa-minm. Forstan, li la fé in sor, la pi fé in kont ék tou-sa.
Soman alapa k’in dimans apré-midi, apré lo vèp, Pér Intél i aminn tout zanfan-d’kèr bat karé. Zour-la, konm fètéspré, olérk i sava Piton Lantanoir (2) paréy toultan, i sava basin Piton dann fon la ravine. Marmay la pa fé dé po désanz azot, kit zis zot ti kilot, épila sot dann dlo po bingné ! Tikok i kit pa son par po lo shien po pik in tét, po nazé, zoué-zoué dann dlo-la !
Mandoné (3) soman, li komans fatigé épila li la fré. Li sort dann dlo, li sava (4) sof soléy anlér in bél kap. Anlér-la, kisa li oi ? In gran bononm an mayo-d’bin ! Lo vant sa lé bél minm ! Ek sa son po lé blan, blan, blan, a-pa-dir-koman ! Tikok i véy : ondiré in figir li la fine oir, mé-soman li arkoné pa lo boug. Alors li di son kamarad Ti Aristid, li di :
« Oté, kisa lé blan, konm sa la, don ? »
Ti Aristid i gét ali gro zyé, i réponn :
« A ! A ! Ou i arkoné pa !… Sa lo Pér, sa, koulou !
Tabouré ! Tikok la rés kami : promyé foi li té oi lo prét té in moun konm lézot : li navé lo pyé konm tout domoun !

Christian Fontaine

1 tan-k’à ; tant qu’à…
2 Lantonoir
3 moman-doné
4 sa