Lékol, na in marmay i apèl Gargoulèt. Li lé long konm in zingad, é li inm fé lo vantar. Lo san zot-dé Tikok i akord pa ditou. Dèk Gargoulèt i oi Tikok, li rod sot dési po tapé. Tikok i di pa Madanm Tibarik, akoz li inm pa soplinn*. Li profèr rézign ali, kour kasièt sak foi li bit si Gargoulèt…

In zour, in marmay pli kosto-i apèl Sankilo-i di Tikok :
« Tikok ! Aport zizib* po moin aprémidi, m’a vèy si ou ! M’a oir si Gargoulèt i tap ankor ! ». Laprémidi i ariv, Tikok i aport in voyaz* zizib po Sankilo : in boit karton plin ! Si lé zantrofèt, Gargoulét i débous, i fons su Tikok ! Kosa Sankilo i fé ? Zot i kroi li va défann Tikok ? Inn tior ! Dèk li oi Gargoulèt, li glis an zourit.

Tikok i bouy dan la raz ! Si telman k li gingn kouraz ! Osi, olèrd kouri konm dabitid, li rès la, an plin dvan Gargoulèt ! E li di : “Gargoulèt mounoir ! Mét la min desi moin si ou lé kapab !” Gargoulèt té atan pa in nafèr konm sa : li rés la, kami* konm inn vas ou lapo tir dlé avek ! Marmay lékol, skou isi, i antour é i kri : « Souk* ! » Gargoulèt i souk pa minm ! Alors Tikok i arpran favèr*, i rodi : “Alé ! Mèt la min si mon zépol si ou st’in nonm ! » Marmay osi, zot koté, i kri : « Oui, Gargoulèt ! Mèt ! Mèt ! »

Alors, Gargoulèt pli onté k’in sien volèr d’ zèf, i poz dousman son min si zépol Tikok. Pa sito pozé, Tikok i manz ali in maniok* dann koin zorèy, i savir ali ! Li la fine ariv atèr, Tikok i mont si li, i pilonn* ali tanksétasé ! Moman doné, Gargoulèt i kri « Tir ! » Marmay konm volay, i kri : « Non, tir pa ! Donn ali minm, don, Tikok ! ». Tikok i asèv donn ali dé-troi kou-d’poin. Apré sa, li larg, li lèv dobout, li agard ozalantour, é li di : « Sankilo, kilé ou ? Ot tour estèr ! M’amont aou vol mon zizib ! Espès gro kapon va ! »…

Dépi stan-la, marmay i respèk Tikok dan la kour lékol. E Gargoulèt, li, l’arèt fé lo vantar !