La sézon gouyavié la rivé. Tikok i rèv rienk sa-minm. Li rèv li lé dan in gran karo, sa lé rouz partou, sa lé fré, sa lé dou, sa i fonn dan la bous ! Li rèv li manz, li manz, li manz, ziska tank’ son vant i rod pété ! Li rèv son granmèr i ariv, i di ali konmsa : « Asé, Tikok, mounoir ! Ou’a gingn mové vant… révolision-n’ vèr… la sias… la koulant » tousa-la. Mé Tikok i akout pa, li bour, li manz, li manz minm tanksétasé !… Landmin matin, Tikok i lèv, o ki d’ gouyavié ! Li rann ali kont li la révé soman ! Mé arien ! La donn ali lidé alé rodé, omoin !…
I amiz pa po toutbon, in dimans aprémidi – konm dan lo romans – Tikok i mont la foré Bélèr ek Ti-Pier, Robèr-Lanklim, Morisko-Pat-kasé, Dafrovil… Malérèzman po zot, lété pa konm dan lo rèv Tikok ! Lo pié gouyavié lé plin, soman lo gouyavié minm i pé kont si l’ doi d’ la min ! Arien ! Tout la bann i pran zot tan, i yinbou ramas in domi panyé sakinn !…
Ariv si la fin – aprosan katr’èr par-la – Ti-Pier i di : « Kosa n’i sa fé ek tousa-la ? … Anon vann, don ! »
Robèr lé pa dakor, pars son momon la di ali aport lo1 gouyavié po fé vinèg ! Lo momon Dafrovil, son koté, i vé fé konfitir ou-sansa la zélé2 ! Tanka lo papa d’ Morisko, li prétan pa son garson i sa vavang partou po vann in nafèr ! Li trouv i fé ont ali !… Alors, i fék i rèt rienk Ti-Pier ek Tikok po alé kri partou :
« Gouyavié ! Zoli gouyavié roz ! Sin fran la mok !… »
Mé, kel gouyavié roz ! Kel vann, bann Tikok la fé ! Ti-Pier ansanm Tikok la bat tout Piton Tay-poul a-pié, la minm pa gingn plas dé mok ! Na rienk in vié fanm, i rèt la-o dann ki-babouk, la trouv lé dé marmay té fé tro pitié, la pran inn pongné, é la donn azot di fran !… Lé pa si-tan gouyavié lavé tro partou ! Mé, domoun lété mizèr minm !…

Christian Fontaine