Dan lané, Madanm Biganbé té sava omoin troi foi simtir : promié Novanm (sa i pas avan tout, sa !) ; apréla : la vèy Noèl ; anfin : lo sèz Mé, po laniversèr la mor d’ défin Gramoune Gabié (Gramoune Gabié té lo mari d’ granmèr Tisia ; parlfèt, té artonm lo gropèr Tikok).

Ariv simtir, Madanm Biganbé té dépoz flèr desi la tonm son gro marinn, té loué in larozoir dolo po aroz la tonm défint tant Bert ; mé ousa k’el té rèt pli lontan té dovan la tonm défin gramoune Gabié zistoman. La, el té dépoz flèr, té aroz, té fé tout. Apréla, el té grinn saplé pardsi saplé.
Résit saplé-la té fé mazine Tikok in moulin-maï. Po démar lo prièr, kan té po grinn lo « ti grin gro grin, ti grin gro grin », Mariz ansanm Tikok té donn la min zot monmon. Si la fin, malérézman, Mariz té may, el té mélanz si telman lo « notropèr » ansanm lo « zévousalimari » ke Madanm Biganbé té oblizé d’ di ael : « Arèt, Mariz ! Talèr, ou lé kab fé mank amoin, mon tour ! ». Taka Tikok, na lontan li té fine larg lo moulin, lès son monmon fé lo « son » tousèl ansanm la bous : « Pss… psss… pss… pss… »
Pandan-stan-la, li té ogard lo bann ti kaz ozalantour ek lo bann ti karo d’ flèr planté bien an ran partou. Tikok té trouv sa bien zoli. Soman, na in nafèr té anbèt ali : navé poin in grin dézord dann simtir ! Navé rienk inn-dé moino ansanm dé-troi zoizo-blan, anlèr franzipane, ke té akompagn Madanm Biganbé dan son saplé : « Pss… pss… pss… pss » !

In ot zafèr té trakas Tikok : dosi lo bann kroi, é sirtou dovan lo pli gran kaz, lété marké : « Ici repose Monsieur Intel… Ici repose Madame Intel… ». É sak foi, la dat osi té marké par an-dsou : « 1951… 1933… 1962… » Tikok, bien anbrouyé, i dmann son monmon konmsa :
« Monmon ! Dopi kan banna i ropoz konmsa, in ?
– Bin, i dépan, mon nanfan : dopi in n’an, dé z’an, troi z’an…
– Totos ! alors Tikok i rovir. Ébin, i fo kroir zot té fatigé po vréman, alors ! »…
Madanm Biganbé té blizé fé bous la bous Tikok, pangar lo mor i vien ral desi son pié la nuit !

Christian Fontaine