Konm dabitid, Gramoun Biganbé ek Zan-Lik la mont bitasion dopi granmatin. Madanm Biganbé, son koté, l’arèt la kaz po okip son ménaz. Alèrkilé, el l’apo tri dri dan la kizine. Tanka Granmèr Tisia, sink-èr, el la dépésé mèt son linz-mès po dsann somin-n’kroi légliz Sint-èspri, pars zordi, sé vandrodi-d’karinm. I fék Tikok lé kaziman tousèl dan la kour. Dan in lokazion konmsa, zot i koné, déryèr marmay i grat touzour ! Zot i rod tout lé fason po fé zot kat-san-kou. Oila kosa Tikok la fé, so zour-la.

Tikok i sava dan la kaz, i pran in bobine fil koton perlé dann tant koutir son granmèr ; li déroul inn grann longèr d’ fil dan lé sink-si mèt an moiyenn. Li anmar dann in bout lo fil in nti morso d’ boi, la grandèr d’inn min aprosan. Apréla li sava koté park koson ek son matéryel, li pran lo panié gramoun Biganbé i tir fimié ansanm. Li poz lo panié gèl-anba, inn plas bien prop ousa la tèr lé bien tasé. La, li soulèv lo panié, é li mèt lo pti bou-d’boi sou lo robor, do fason k’in koté lo panié i tous atèr, é l’ot koté non. Kan lé fini, li sava dan la kizine, li vol inn ponyé ti maï an misouk son monmon, li fane lo maï sou lo panié. Tout son trin an ord, li sa déryèr park-koson, li pas desi in bor, li vèy, son fil koton perlé dann son min. Dék in zoizo i vien manz lo maï : tok ! Tikok i ral desi lo fil, lo ti boi i tonm, lo panié avek ; zoizo lé pri dsou, zot poi lé ofé !…

Christian Fontaine