Tikok, so zour-la, la kol nèf moino ek dé pti bèk-roz ansanm son gob. Kan li sava po mèt lo onzièm zoizo dan lo panié-merl, na troi i sap, i rèt uit !
« Arien ! i di Tikok, uit n’asé po moin fé in bonn ti fritir a-soir ! Hon ! Mianm ! Mianm ! Mon bous i fé d’lo, déza ! » Osi, Tikok i amiz pa po komans plim dé moino. Soman, desi lé zantrofèt, son granmèr Tisia i rovien n’ lo somin-n-kroi légliz Sint-Espri, i oi ali ek lé dé pti krim dan la min, i dmann ali konmsa :
« Ou na lidé manz zoizo fri, asoir, ou la, Tikok ?
– Bien sir, ma-mèr !
– Bin ! Kont pa dsi !
– Akoz, ma-mèr ?
– Akoz zordi sé… vandredi-d’Karinm ! Bondié lé pa kontan si i manz la viann ! »

La, san prann lèr ek Tikok, Granmèr Tisia sè-d’ souk lé dé pti maléré moino plimé, anvoy ek lo… shat ! Tikok i rèt la, i ienbou pa di arien son granmèr ! Soman li lé bokou mortifié d’ sa ! Son kèr i rod pété ek la raz ! Sa i mont, i mont, i mont dan son lestoma, i roul dousman dann son gozié séré, i dépoz dan son bous in lespès lo d’ fièl, i débous ziska son zié, é la i débord konm in dig i sar sédé !… In ninstan apré, san rogard son granmèr, li sava, li asiz desi in ros. Konm son zié i port desi lo mimit l’apo lès son moustas, li détourn vit son figir ! Son zié astèr, i vir dousman-dousman dann vag !…

An li-minm, Tikok i kalkil, li di : « I manz pa la viann, in vandrodi d’ Karinm ! Sa in rolizion sa ? Akoz lo shat na lo droi manzé, li ? » Asmoman-la, la raz i ropran ali, li lèv, li sava po rouv la port lo panié-merl, fé vol tout lo bann zoizo ! Soman apré, son moral i arvien, li bat in kalkil, li di : « Non ! adémié fé fane mon kolèr, lès lo fritir zoizo po Dimans ! I di pa sak i plèr vandrodi, i rir lo dimans ? »…
Konm dé fèt, lo dimans apré, tout lo famiy la gout in bon ti kari zoizo ek poiron. Si telman bon ke minm granmèr Tisia la pi mazine lo Karinm ! Ankor moins « la société protectrice des animaux » ! Domoun dan léo lé si telman mizèr !…

Christian Fontaine