Tikok, a lékol, té fine dépas kour éléfantine : li té fine ariv kour élémantèr par la. In zour, dan la
klas, lo mèt l'apo esplik sépa kel léson – in léson d’ moral, si mi tronp pa – é li di konmsa :
« Supposons qu’un gosse tombe dans la cour de récréation. Qu’est-ce que vous faîtes ? »
Na in pé d’ marmay i répond : « i fo rolèv ali ! ».
Na dot i di : « i fo kri lo sirvéyan ! ».
Na dot ankor lé plito d’ avi ki fo fé apel doktèr osinon-sa linfirmièz.

Mé na inn dan la band la pa tro konpri lo ka, li dmand : « Sé koi in gos, msié ?
– Un gosse, tu ne sais pas ce que c’est, Fanfan ? … Qui c’est qui veut lo lui dire ? … Alors, c’est
quoi un gosse ? Qui lo sait ? »
Tikok i lèv vitman lo doi, i di :
« Moin, msié !
– Eh bien, vas-y, Tikok ! »
Alors, Tikok, fièr d’li, i lèv an boi, i ferm son poin gos, é li lans son poin an direksion in marmay
koté d’ li ! Aminm-tan, li di :
« Pan ! oila po ou !… Konm saminm i lé in gos, msié ! E tansion : si ou la gingn sa dan out koko d’
tèt, ébin ou i oi zéklèr ! ».
Initil di azot ke tout marmay la tienbo zot vant po ri ! Taka lo mèt, li té koné pi si li té kouyon
minm ! Antouka, li la trouv « gosse » la in pé… gos !

Christian Fontaine