Apréla, gramoune Biganbé ek Tonton Nénèl i bour do-boi dan lo four : filao, grévilèr, kasia… Lo four i boukann in kou (Tikok i anprofit po alé oir, déor, « la barb mon gran-pèr i sort par la sominé »). Apréla, do-fé i donn di-gaz, i sif, i sant, i pèt, i arèt pi ! A-s’moman-la, lé dé gramoune i sava, i bit la kirbit (otroman di : lo sodièr) ansanm brans zerniom vèr. Kan lé plin, zot i vèy : dèk la fimé i komans sort dan lo fey, zot i foul ek zot pié. Anlèr la kirbit ; tou lé dé lé konm dé Malgas l’apo dans kabaré « servis bèf » ! Kan la masine lé bien bité, bien tasé, tout, zot i mèt lo sapito desi, i sèr ali ek serprès, i bous lo zoin ansanm la bou…
Pandan-s’tan-la, Tikok i saroy do-lo po ansèv ranpli lo réfrizéran (1). Son nti zo i glas ek lo srin d’ pli ; soman, marmay na kouraz ! Zan-Lik, dobout desi in nti lésèl boi-d’kasia, i trap lo ferblan desi lo tèt Tikok, i vers dan lo réfrizéran. Li fé antansion, sak foi, pangar li kongn lo kol-dé-sign ek lo serpantin…
Briyar, déor, i komans fane le ti-son maï ozalantour. Li sort par dann fon ranpar, li mont an boufad konm kan i sort tir la mine. Astèr, partou, i fé brine (2). Lalanbik lé kaziman dann fénoir. Eksa, la fré i kok ! Gramoune Biganbé i pran son pèl, i bour dan lo four, i tir dé-troi gazon d’ brèz ek la sann sho, i antas dann in koin. Apréla, li di ansanm son dé garson : « Oila patat ansanm pistas, marmay ! Fé griyé ! Nout dé Nénèl, pandan-s’tan-la, nou va vey lo bak-ésansié. Saspé st’ané, nou va fé inn bonn kuit ! » Fo oir kontantman Tikok, a-s’moman-la ! Li asiz desi in biyo-d’boi dvan lo fé. La, li komans shanté : « Griyé, griyé pistas !… Griyé, griyé pistas !… »

Christian Fontaine

(1) rofrizéran
(2) La brine la rantré.