Lapré-midi lo vin-n’sink désanm, Grozil, Vantkoupé, Tipol, tout la klik, i artrouv azot la kaz Tikarl. Zilienn, Mariz, inn-dé zot fi osi lé la. I fo antann lo dézord ! Pétar i pèt, siflét balon i kri, tronpét plastik i fé kanar… Taka Tikok, mazine pi ! Ek son tanbour név Tinoèl1 la port po li, li fé son vayan, li bat, li anfini pi.
« Rien ! Granmér Tisa i di, po in kou, zordi sé nouél, i fo bann marmay i kontant azot, i ariv po souvan ! »
Madanm Biganbé i di pa arien, mé lé konm ki diré, el osi i anbaras pa lo vakarm. Na rienk gramoun Biganbé lé pa kab siporté ! I fo konprann ali osi, lo pov : li vien n’ fini aras in karo vié sous kann, dopi dé-troi zour, i fo pa in mous i poz si li.
Soman, gramoun Biganbé sé in boug i di : « la pasians i géri la gal ! ». I fé, zour-la, li osi li mazine lo marmay l’éné in zour dan in park-béf, laba dann péi déor. La, li agard Tikok ék son bann kamarad l’apo zoué la mizik, li di dann son kér : « i fo mi fé plézir azot zordi ! Zot osi lé kaziman éné dann park-béf ! »
Sé la k’ son zié i port si lo pié letsi, lo pli bel pié néna dan la kour. Sé pa konman i fé, san kalkilé li kri :
« Tikok ! Zan-Lik ! 
– Koué, papa ?
– Zot i voi sa anlérla ? Lé roz, lé zoli, lé dou ! »
Tikok ek Zan-Lik i ogard ali san konprann.
« Zot la pa konpri ? alors gramoun Biganbé i fé, sa lé dézinié po zot ! »
Tikok ek Zan-Lik i atann pa i di azot dé foi, i trap soubik, tant, bertel, i mont anlér pié lestsi, i kas i kas, i kas. Bann kamarad Tikok la zamé fé in parti letsi konmsa. Si-telman in domi-ér apré, gramoun Biganbé i arpas par la, i oi azot ankor po manzé, li di azot :
« Alé, manz, manz azot marmay ! Vomié i fé mal azot k’i gat… Zordi Noèl ! »