« Monmon ! Not dé Tikarl i dsann la kaz Timari, in ?
– Alé azot. Amiz pa soman. Sirtou, Tikok mi prévien aou, artourn pa isi ek linz an morso, sinon mi koup out déyér. »
Ariv la kaz Babé tout la bann lé apo zoué loukasiét. Tikok ék Tikarl i rant dann ta. Soman, pou komansé i fo rod kisa lo mèr. Sé Zorzyane i rouv lo zé :
« Plouf ! Inétikét, Marie-Bonbét, Kani-kanét, trik ! »
Promié trik i tonm si Zanpièr.
« Plouf ! Inétikét, Marie-Bonbét, kani-kanét, trik ! »
Dozièm trik : Tikok.
« Plouf ! Inétikét, Marie-Bonbét, kani-kanét, trik ! »
Lo tour Maryanne po sorti. I rét Zorzyane ek Tikarl, astér !… Sé Tikarl va tonm lo mèr.

Tout i fé kondision : « In bigobé*, ali minm lo mér ! ».
Zot i di Tikarl bous son zyé, kont ziska vin. Aprésa, tout la bann i kour kasiét, Zorzyane i kour dann karo zerb roz, sou pié kinkina. Zanpièr li, li mét zis son tét déyér in féy sonz, la li kroi personn i oi pa li. Tikarl i kont, i kont minm. Soman, li fé sanblan bous son zyé, aléoir, li ogard rant son dé min. Li koné Zorzyane i sa rod bigobé. Li bouz pa son plas, li kont minm. Kan i ariv vin, li kri :
« Paré, pa paré, mi débous !… Zanpièr vien aou ! Moin la vi aou ! »
Apréla, li véy dék Zorzyane i lév son nti tét dann zerb, li kri :
« Zorzyane, pa bezoin débouz* plis, moin la vi aou. »
Astér i rét rienk Maryane ek Tikok. Tikok la pa loin : i dbout koté in zénis dann park. Béf i kour pa, li, li lé abityé. Son pié lé dann ros tann, mous karapat i pik ali, li bouz pa in grin pangar va oir ali.
Ferkoué* Tikarl i sot, i kri :
« Bigobé ! Aou minm lo mèr, Ti-karl ! A ! a ! la gingn aou la ! »

La zoué, la zoué… Aprésa, tout la bann lavé fin, la parti manzé.