In zour (Tikok té ankor desi le ban katésis, li té pokor fé son promièr kominion), le masèr k’i fé katésis, i esplik :
« Jésus a dit : Heureux celui qui partage… Par exemple mes enfants, je partage mon pain avec mes petits camarades… ».
« Je partage mon pain !... Je partage mon pain !... » Mé kansa Tikok té oi la koulèr d’in bou-t’pin, li ? Inn foi le tan ! E ankor ! Ek sa, kamarad, li navé si telman ! E si, dék li lavé asté in nti pin ousansa in makatia, té falé li partaz an nti morso, é bin sak kamarad noré pasé po bous kansréti son trou d’ dan !...
Alors, Tikok té trakasé, li té mazine an li minm : « Eré sak i partaz… E lé vré : sak lé kab partazé lé éré !... Mé amoin ? Moin lé oki konm Zob : moin la poin le moyen d’ partazé !... » Anfin son nti tèt i travay minm, li, la !
Rozman, apré sa, lo ma-sèr la asèv son lesplikasion, la di :
« Si vous n’avez pas de pain, ni de chocolat, ni de bonbon… Vous pouvez avoir de la joie à partager !... »
E ladsi, Tikok la maziné : « Bin, m’a fé l’ komik po mon kamarad, alors !... » Soman, la ankor, minm si son kèr lavé klersi in pé, li té pa trankil : li té oi pa koman sa i pouré donn manzé son kamarad !…

Christian Fontaine