Vandrodi-Sin, granmoun Biganbé (lo papa Tikok) ek granmoun Zilo (sad Tikarl) la parti rod gèp, akoz so zour-la i manz pa la viann. Tikok ek Tikarl, zot, zot manman la obliz azot alé légliz po Somin n’ Kroi. Sar rienk dimans po zot alé o gèp, zot tour…
Dimans prémidi i ariv. Tikok i prépar son golèt*, son sifon, son soubik ek son zalimèt. Tikarl-si i fé parèy… Si l’ kou dé-z’èr moins n’kar, ala zot o may* ! Zot i koup dann karo zerbabouk, i travers dann karo maï tonton Batis, i ariv an fin n’ kont, an lèr piton-zakasi.

La, Tikok ek Tikarl, lo né an lèr, i fouy, i fouy minm.
Tou-d’in-kou, Tikarl i kri : « Tansion, Tikok, in mèr gèp ! »
Tikok i ogard, i di : « Lé pa in mèr inn-tior, sa ! Ou i oi pa li na poin la gonm dan la bèk ? Epi, li vol pa vit. I fo in gèp i fis* pli vit in lavyon po suiv ali é trouv in ni !… »

Pandant s’tan-la, zot-dé Tikarl i avans minm. Moman doné, zot i glis sou in touf poivoyé :
« Ay ! ay ! ay ! Tikarl !… » Tikok lavé pa fini kozé, in gèp lavé sort an lèr in brans, lavé fons si li, lavé pik son né !
« Kilé ? Kilé ? Tikarl i di. Na in ni ! Na in ni ! ».
Tikarl i trap son sifon, i alim, i boukann lo gèp. Zot i tir l’ ni, é Tikok i di :
« La pik amoin, rien ! Mé o moins, nou la gingn in bel ni ! » Apré sa, li pran lo ni, li tir in gèp dolé* ddan, é li kraz si son né pangar sa i gonf é i devien konm in tomate !…

Tikok ék Tikarl i rod, i rod minm. Si l’kout sis-z’èr, zot i retourn la kaz Madanm Biganbé ek sèt moyen ni. Inn bonn fritir po asoir !…