Tikok la trouv in nouvo zé. Rékréasion li zoué èk son dalon Tikarl :
« Kalkil in sif, Tikarl ! Dopi inn ziska 1000 !
– Nèf ! Tikarl i di.
– Di p’amoin, koulou ! Kalkil dann out tèt !
– Bon ! Moin la fine kalkilé.
– Lo sif ou la maziné la, miltipli ali par 2 !
– Lé bon !
– Azout dis !
– Wèy !
– Diviz tout lo total par dé !
– Aspèr in… lé bon !…
– Estèr, dann sat ou vien n’trouvé-la, tir lo sif ou la maziné, tanto-la ! »
Tikarl i réflési, i kont si son doi déyèr son do, i réponn : « lé bon ! »
« Anon paryé mi koné konbien ou la trouvé ?
– Alé ?
– Ou la trouv 5 !
– Bin ! Saminm minm ! Koman ou la fé, don ? Anon rozoué !
« Bon kalkil in sif.
– Dakor ! 
– Miltipli par 2 !
– Paré ! 
– Azout 40 ansanm ! 
– Karant… karant… karant… Lé bon, kontinié !
– Diviz par dé !
– Lé bon.
– Tir lo sif ou la kalkilé d'dan !
– Lé fé !
– E bin, i rès 20 ! Pa vré ?
– Ou la trouv zis ! »…
Tikarl i arvien pa ! Mé konm li lé antisé* po trouv lo bout, li dmann Tikok po rofèr inn troizyinm foi. E Tikok i trouv minm ! Alors, po fini, Tikarl i dmann :
« A ! A ! koman ou i fé don, Tikok ?
– Bin lé fasil ! Tikok i esplik. Lo nonm ou i di « azout » la, ébin sé touzour son moitié ou i trouv toultan si la fin ! Si mi di « azout 10 », si la fin i trouv 5 ! si mi di « azout 40 », i trouv « 20 !… »
Tikarl lé kontan li la trouv lo trik. Ek sa, li la gingn biskui* po la sominn ! Fo oir ali ! Lo roi lé pa son kouzin !…