Konm sé Dimans, Madanm Biganbé i tié in volay po fé kari. Pa-sito fine plim lo kou, Zan-Lik i dmann :
« Monmon ! Lo foi po moin, in ?
– Non va, mounoir ! Lo foi sé po papa : li na pi d’ dan !
– Lé bon, monmon ! Mé lès la tèt po moin alors ! »
Mé Tikok i lèv dan son koin, i di :
« Non monmon ! La tèt sé po moin !
– Done p’ali, monmon ! Zan-Lik i arvir, sé moin la dmann promié ! »
E lé dé i dispit minm, zot la !
Po fé finir ek sa, Madanm Biganbé i pran dé pti zik, in moyen mti ek in pli gran, i di :
« Bon, nou va tir o sor ! Sak i trap lo pli pti bout do-boi va gagn la tèt ! ».

Par kou d’ sans, sé Tikok i gagn ! Soman, Tikok i kontant pa d’ sa : kan i ariv onz-èr, li rod fé zalou Zan-Lik ek son tèt poul dann son min :
« Zinzin !... zinzin !... Zan-Lik la pa gagn la tèt-e ! Sé moin la gagné-re ! Zinzin ! Zin… »
Ala pak, desi lé zantrofèt, in mal-lo-shat i sot d’anlèr la tab, i pas an bolid koté Tikok, i souk son morso d’ viann, i kour avek ! Tikok na bo kriyé : « Oté shat, oté shat volèr », li na bo pléré, kour derièr… tro tar : shat-la la fine ariv a perpèt ! Misié Biganbé i bann, i di apré Tikok :
« Ou la vi ot manir zinzin, zinzin ?... Ou lé pli avansé, estèr ! »
Pandan stan la, Zan-Lik, desi son tabouré, i rir tout son kontan, i di :
« Lé bon minm po Tikok ! Lé bon minm !... »
Madanm Biganbé, el, i pran la pitié son dernié garson, i ardonn ali dé zot morso volay. Soman, dan la marmit, i rès rienk la zèl ek la pat !... Kan i di azot, marmay : « Sak i fé zalou i rès loulou », zot va dir lé pa vré ?

Christian Fontaine