Tou-lé-zan, dann moi zanvié-févrié, Tikok i sa rod gèp ek son bann kamarad. Zot i tras dann piton, la savann, la ravine… partou, é, souvandéfoi, i rotourn zot kaz ek in paké d’ zoli ni. Po partazé, lé fasil : sakinn i pran lo ni li la tiré. Ebin n’in zour, Tikok la gingn son… bou-t’né ! E in bou-t’né an tapok* ankor !

Kosa la fé, so zour-la ? Tikok i travers in karo zakasi. Tazantan, li arèt po li suiv in mèr i pik droit ek la gonm dan la bèk. Dé-troi foi konmsa, ziska tank li bit si in bel ni plat, pli larz in nti vann Malgas.
« Sé moin i tir ali ! » Zan-Lik i kri.
– Non ! Sé moin la vi promié » Tikok i di, brèz do-fé dan son zyé !
– Bin, oila l’ sifon ek lo zalimèt ! Tir ali ouminm, si ou vé ! » Zan-Lik i fé san fason.
– Non va ! Tikok, i arvir. Moin la pa bézoin d’ sifon ek zalimèt, moin ! »
Tout la bann i gèt Tikok in manir drol, zot zié ékarkiyé !
« Bin oui ! » Tikok i arpran, fier konm in kok batay ! San sifon konm san boukanaz mi tir ali, moin ! Sé papa la amont amoin ! La di konmsa : ou i pas la transpirasion partou si ou. Apréla, ou i sava si lo ni. Lodèr transpirasion i fé kour lo gèp ! »
– A bon ? in kamarad i fé. Bin, ésey ali, alors ! »

An-minm-tan, tout la bann i rogard azot rant zot, é i oi Zan-Lik i fé azot in kou-d’zié dan lèr d’ di azot :
« Bouz pa ! Na oir msié l’roi travay ! »
Alors, sétaki i tourn la tèt po pa ri, sétaki i mèt la min dvan la bous, sétaki i sif an rogardan anlèr !…
« Alé, Tikok ! Zan-Lik i di. Aprésa, grouy aou, ni sava, nou ! »
Tikok i perd pa la kart*, i tir son somiz, i fé inn-dé mouvman zimnastik dann soley. Apréla, li pas son min si son fron, si son figir, sou son kelkel*… partou, é li frot partou son kor ek la transpirasion. Apréla, li fé gonf son poitrine konm bann zouèr la bok*, é li sava droit si lo ni-d’gèp ! Li la pokor poz son min dsi, tout-suit bann gèp i lèv an boi, i fons si li, i moung ali si l’ pinpin*, si lo né, dann zié, dann tété… partou !
« Ay ! Ay ! Ay ! Monmon ! Monmon ! » Tikok i kri.
E li gingn lo santié siendan, li tras an dsandan, gèp touzour déryèr, li ! La fine ariv omoin in kilomèt, ou i antan ali ankor :
« O skour ! Lasasin ! ! »
Pandan-s’tan-la, son bann kamarad atèr po ri !…
A, Tikok, mounoir ! I fodra ou i transpir ankor, po fé sort lo gèp si zot ni !