Nou la di lotro-zour : Tikarl-la in marmay la teknik, Tikok : in marmay lé plis poèt-poèt ! Sa lé bon, mé soman, l’inn konm lot i pé fé gingn aou dézagréman.
In kou, Tikok té la kaz Tikarl. Konm zot té rasazié zoué kadok, Tikarl i di :
« Anon alim do-fé, é na oir kisa i fé mont la flanm pli o ! »
Tikok i di : « Anon ! »
Ala, tou-lé-dé i sa rod la pay sek, ti zik ek do-boi. Tikarl, po anbar lo van, i prépar son fé pa tro loin n’ la kizine. Li krak son zalimèt. Do-fé la i pran tou-din-kou ! I fé in flanm la otèr d’inn tab !… Tikok, li, i sa in nti-pé pli loin, mé li lé o bout po démar son fé. Li bour in voyaz* la pay ek ti zik désou, li souf, li souf minm… mé inn-tior* ! Do-fé i touf, i pran pa minm ! Moman-doné, in nti flanm i lév, soman lé fay… Alors, Tikok i dékouraz, i di : « Alé graté, don ! Mi arèt, moin !… »
Tikarl i moukat ali, i di : « Daoir ou la pèr pis o li » (gramoune i di sa, i di kan marmay i zoué ek do-fé, zot i pis o li lo soir).
Tikok i réponn : « A ouè, lé pa sa !… La fimé i boukann tro ! Mon larm dé-zié i koul sépa koman ! »
Apré-la, li ogard lo fé Tikarl, li di soman : « Lé zoli !… Lé zoli !… Gèt flanm-la ! Lé konm solèy, lo soir, déryèr lonbraz piton Yasint !… ».
Tikarl lé ankourazé, li bour minm do-boi sou l’ fé ! Fé-la i grinp, i grinp, i grinp … ziska-tan-k’ i rod po pran dan la kizine !
Tikarl ek Tikok i oi pa sa, zot ! Mé Madanm Timari i oi, el ! Alors, Madanm Timari i ariv, i trap in fouèt pés, i pran la pèn pas dan la sann so, apré-la, i lim*, i lim minm Tikarl ! Oila po la teknik !… Madamn Biganbé i ariv son tour, i fou Tikok inn bonn dékoksion !… Oila po l’ poèt !… Konm koi, dan la vi, i fo la teknik konm la poézi, mé pa tro d’ kouyonis !…