Létivèr i pli sou la briz, i fé pèt ti zétoil partou dann soley i bri for. Lodèr zerbabouk i lèv dann karo zantak, lèrk in tralé ti bek-roz i vien dsi po fé balansoir. La o, dann filao, zoizo-bélié i fé zot ni konm roulèr pandiyé ; tout la bann, an may-mayé, i anvoy zot romans kabaré : « Tioulit lit lit !… ». Martin, anlèr pié vakoi-pinpin, i réponn azot in rofrin kas-kasé : « Kra… kra… krak ! »

Kan Tikok i oi toutsa, lanvi d’ zoué i pran ali. Malérèzman la koup l’arivé. Madanme Biganbé la di zot dé Zan-Lik :
« Alé, marmay ! Zordi, zot lé gran : i fo alé èd zot papa ! »
Alors, lo pov Tikok lé la, dann karo kann. Mésié Bizok i koup, Tikok i antas ! Pandan s’tan-la, Zan-Lik i saroy pou Granmoun Biganbé sarz la sarèt…
Apré sa, Tikok i prépar dé-troi paké kèr-kann po bèf. Li inm pa tro so korvé-la, akoz divé i grat plis pir k bourbouy, mé kosa ou’a fèr kan ou lé mizèr ! Rozman, tazantan, Granmoun Biganbé i di ali :
« Alé, mounoir ! Sis in kann po ropozé, po rafrési ot gorz ! »
Alors, Tikok i sis in kann. Mé pli li sis, sé plis ke lé dou !…

Christian Fontaine