La pli la ranforsi, i donn digaz minm si la tol la kaz. Lo van i sif dann karo kasia, konm tonton Pièr kan i zoué violon ! La ravine, dann fon laba, i ronf pli for Madanm Débasin dann son volkan ! Na in pé domoun i koup dolo kanminm, mé gramoun la défann Tikok fé konm zot, panga li noiy. Siklone Zéni té parey : na inn la sèy koupé, dolo la ral ali !
Tikok ek son monmon lé fermé dan la kizine. Lo monmon i grinn saplé : « Zézi, Marie Zozef ! Fèk la kaz i tienbo dobout ! ». Tikok, li, i sof dofé. Talerla, li la anprofit lanbéli, li la kol ti kanar tann èk lo monmon, la mèt dann in kès koté la sann so. Tikok i asiz katpat, i souk in nti kanar, i zoué ansanm, i domann :
« Monmon ! Bin pokoué lo monmon kanar lé noir, son nti lé zonn ?
– Bin, mounoir, mi soré di aou moin minm ! Mésoman, zot osi va ni noir kan zot sar gro ! »… Tikok i kontinyé karès la tèt lo ti kanar ; firmizir, son zyé i vir dann vag, li tonm an réfleksion. Li kalkil :
« Papay, kan son po lé vèr, son grin lé blan ; kan son po lé zonn, son grin lé noir ; kan li grosi, li sanz koulèr ; domoun sové lé noir, osinonsa, lé rouz konm sad Tikok ; kan i viéyi, i vien blan… La vi-la, Tikok i di po fini, sa in roulman i fini pi ! »
Soman na in nafèr pli anbèt, i trakas Tikok, i fatig son konprénir : li mazine garson Doktèr Zan i mèt soulyé, i manz dopin èk dobèr tousala… Ali, Tikok, son pyé i mars touni dann vèrboutey, son manzé, souvandéfoi : brèd lastron ! Li armann ankor son monmon :
« Monmon, pokoué na in pé, plik lé ris, sé plik i vien ris ? Na domoun plik lé pov, sé plik i vien pov ? Sa lé konm ti kanar minm sa ?
– Dapré moin, non, mon zanfan ! Pito, trap out liv, aprann out léson. In zour, ou’a konprann tousa ! »

Christian Fontaine