Kan i ariv Novanm-Désanm-Zanvié, domoun i réziste pi ek la salèr. Zène-zan i mars dann somin, zène-fi i roul an dékolté ; sétaki i rod in manir po respiré !… Bann marmay, zot, zot bor sé la ravine, osinon-sa la rivir. La rivir-la, sa lé konm in lespès paradi po marmay : ladan, ou i gagn fé basin po bingné ; ou na la sab po fé tikaz, ou na kavern po zoué loukasièt ; ou na zanblon ek zanbrozad po manzé ; ou na ankor mang ek tamarin vèr po gout ek piman… Mé pli gadianm ke tou-sa ankor, ou na zangi ek kabo po kolé ! Pès kabo ek zangi ? Sé zistoman sak Tikok i inm plis !

Na in kou, ali ek Zan-Lik, Ti-frinm, Rolan, Bébèr, Grozil…, zot i désid alé kol kabo. Sétaki i aminm goni, tant ; sétaki* i prépar la mok po mèt kabo vivan ; sétaki i nétoiy touzour la marmit !… Kan i ariv dann fon la rivir, zot i bingne in kou. Apré-sa, zot i komans fé ti kouran. Po fé ti kouran-la, zot i kas-kas si lo bor lo kanal i aminm do-lo moulin-maï Misié Robèr. Aprosan inn démi-èr d’ tan par la, zot na omoin in domi tant kabo ek zangi mélanzé !… Alors, lo gou i pran azot, é zot i kas-kas minm kanal Misié Robèr ; ziska tan kanal-la i rod* sèk !…
Moman doné, tout la bann i antann « ou, ay ay ay ! ». Zot i rogard, zot i oi in gro blan, la min si kolé Tikok ! Sé Misié Robèr ! Son gro voi i rézonn dann ranpar : « Zot la pa fini fé sèk mon kouran d’lo ? » A pène li la fine kozé, tout kamarad i larg tout zafèr an-plan, i rod somin po kouri ! Na rienk Tikok i rèt pri !… Rozman Misié Robèr i fé pa ali arien !…

Soman, li pran lo tant zangi, li sa avèk !…