Granpèr Bouloun lé mor ; granmèr Tisia, olèrk rès tousèl, la profèr vann son ti bout kour po vni rèt la kaz son fi, Madanm Biganbé. Tikok lé kontan granmèr lé la. El i yèm dispité po in oui po in non, soman kan son dégré lé bon, èl i rakont gayar zistoir : Tizan, Roklor, Granmèrkal… Ek sa, kan èl i tous larzan son salaryé, èl i asté inn-dé ti kouyonad po Zan-Lik ek Tikok.

Granmèr Tisia, sa in moun lé bien rolizièz : toultan ou i oi èl grinn son saplé osinonsa ogard in liv-de-mès (kaminm lé lanvèr, arien). Sé kan i ariv lo soir, zafèr i gat. Pasito fine manzé, granmèr i kri :
« Tikok, dégaz vitman lav ot pié. Aprésa vien po di la prièr. »
Tikok i akout, sansa li gingn tangaz èk gramoun Biganbé, pars gramoun Biganbé i yèm pa kontray son bèl-mèr. Li siport pa antann dispit ! Ebin, Tikok i vien, i pas aznou dovan lo li granmèr, épi lo… lékol i komans.

Granmèr i di :
« Répèt apré moin :
« Notro pèr ki èt zo sié,
« Ké ton non soi santifié,
« Ké votro riny ariv
« Ké vot volonté sou la fèt sou latèr ! »
La, lé in pé long, Tikok i gingn pa trapé, li may :
« Ké votro volonté … ké votro volonté… ééé. »
Alors, granmèr Tisia i kri in bon kou :
« Sou la fèt, sou la tèr, kouyon ! »

Sé la Madanm Biganbé i lèv dann son koin i di :
« Mé monmon, ou l’apo amont marmay la prièr épi ou i zir ! »
Ayayay ! Pokoué Madanm Biganbé la kozé. Tout-suit gran-mèr i obli la prièr, i komans angrinn aèl. Tou-sa lo tan-la, Tikok, li, i rèt aznou minm ; li la minm ziskatan granmèr i di ali :
« Lèv mounoir : alé dormir ! »

Christian Fontaine