Dabitid, bann Ti-blan dan lé-o i inm pa tang. Sé lidé ! Pars in bon kari tang, na poin rien lé pli bon k’ sa ! Antouka, po Tikok, sé son méyèr viann ! Telman k si té posib manz la plim ansanm, li té i manz !… Soman, si kari tang lé bon, alé rod tang lé pli bandé* ankor ! Bien-sir, promié viré Tikok la fé, li oblira pa !…
Soir-la, navé : gramoun Biganbé, défin Vié Batok, Tipol ek son frèr Grozil, Zan-Lik, ek inn-dé kamarad ankor… Tout la bann i mont la « Lign Douz-san » ek zot far, zot goni, zot sab… Déor, la line i éklèr, in nti van fré i komans lévé, kamionèt i file minm dann zerb mouyé… Momandoné, i ariv dovan in kaz domoun : sé kamarad Aristid. Gramoun i fé lèv ali. Li lé dakor po ki fouy son térin. Tout fason, li osi li mèt son linz, li vien ansanm… dé san mèt pli loin, kamionèt i arèt.
Pa-sito arété, Bobi ek Mistingèt i sot atèr, i komans grinsé, brann la ké, rod somin pou kouri… « Bobi Tipol i di, é ou osi Mistingèt ! pa bézoin tro nervé ! Sanm po moin nora travay po zot asoir ! » Apréla, li kri « Souk ! », é tout suit bann sien-la i tras dann zerb, Bobi par koté la ravine ; Mistingèt dann karo tamarinn-linn par an-o !…
Minm pa sin minit apré, Bobi i aboy : « Ouaou !ouaou ! ouaou !… »
« Ala zafèr ! Biganbé i kri. Souk ali, Bobi ! »
E toulmoun sèd fonsé direksion la ravine ! Mank in-pé, Tikok i kas son zanm dan siko kasia* ! Ariv si l’ bor, zot i oi Bobi l’apo sobat ek in mal tang, pli bel in koson sévraz !
« Larg sa, Bobi ! » défin vié Batok i kri, son sab dan la min. Apréla, li trap lo tang, li mèt dan l’ goni…
Pa-sito fini, Mistingèt i aboy son tour par an-o. Minm zès : toulmoun i fons ! Soman, la, lo ka lé pli difisil : Mistingèt la fine fouy in trou pli gran k’ lo « trou d’ For » ! Lo tang i grouy dann fon ! Soman, n’in ros i anbar*, i gingn pa trap azot !
« Souk ! Souk, Mistingèt », Tipol i kri. Lo pov Mistingèt i débat minm ek son dé pti pat ; Bobi i ariv, i donn ali la… min ; rien a fèr ! Lo ros lé tro gro, lé dé sien i vien pa bou minm !… Moman-doné, Gramoun Biganbé i di :
« Daoir sa inn mèr ek son pti, inn foi k’ lé o fon konmsa ! Alon nou, vo mié pa tro détruir ! »
– Lé vré, vié Batok i arvir, amizra pa, na trouv d’ot !… »
Parol vié gramoun-la daoir té béni ! pars, soir-la, la konpani la trap… di-sèt tang ! Uit vivan, nèf krévé ! Mazine azot la parti k’ zot la fé, landmin onz-èr !… La, Tikok té kontan, la !