La pli i farine, aprémidi. Tikok i aprann son léson zéografi tou-sèl dan la kaz. Apré la, li vien ek son monmon koté de-fé dan la kizine.
Zan-Lik, son frèr, lé apo aranz park lapin koté touf fig, pangar mové tan i ariv. Zan-Lik la fine kit lékol : li na sèz an, é son zétid la porsi ali ! Son lestilo, astèr, sé son gongon n’soufrans…
Monmon Tikok lé asiz desi son nti ban, i grinn maï po poul. Tazantan, el i lèv po alé aktiv do-fé : el i trap son kapline, i vann, i vann minm ! Do-boi lé mouyé, i flanm pa. I kass ti zik, i fout sou. Do-fé i boukann in kou, aprésa i flanm. Do-boi i kri, i sif, i grins ek la salèr !
Dék i grins-la, Tikok i di :
« Do-fé i dman la viann monmon ! »
Monmon Tikok i arvir :
« Poitan, lé pa la viann moin l’apo fé kuir. Mé lé kaziman osi bon ! »
An dizan sa, el i dékouvèr la marmit. Tikok i kri :
« Monmon ! Ousa ou la tir ti-maï, don ? Papa la di amoin navé pi !
– Di papa alé ké, don, Tikok ! Akoz li inm pa lanmsim li di sa ! Mé, talèr, zot dé Zan-Lik va fèr ali zinzin ! »
El i rir, Tikok si i rir… An minm tan, el i tir in-pé, i donn ali.
Ti lanmsim-la lé doré konm la tèt Tikok koulèr la brèz do-fé. Tikok i pran, i manz, li rové ankor…

Christian Fontaine