« Tikok !
– Oui, monmon !
– Zot-dé Zan-Lik, zordi, va mont la kaz Antonia… Bann Tikarl i sava ek zot !
– Bann Tikarl ?
– Oui ! Madanm Zilo lé malad. I fo pa son bann marmay i rès la po fatig ael ! 
– E papa i sava osi, li ? »
– Non va ! Aristid na travay po fèr isi ! »…

Antonia, sé la matant Tikok ! I apel ael : Matant Tonia ! Toulézan, le matant an kestion i di son bann névé-niès, vien èd ael ramas kisoi vouinm, kisoi zantak, kisoi zanbrovat… dan sa bitasion. Soman, dabitid, lo papa Tikok i mont avek. La, non ! Tanka bann Tikarl, zot na poin labitid monté. E la, tout la grap marmay i doi mont avek ! Tikok i konpran pa kosa i espas ! Surtou k’ son monmon la prévni sa – pa la vèy konm toultan – mé tout-suit po tout-suit ! Li kalkil. Li trouv néna… zangi sou ros ! Osi, fourné konm li lé, li dmann :
« Mi oi madam Zilo, dépi in bout tan, na in gro vant ! Mé ! Kel maladi el néna, don ? »
Monmon Tikok i pran toudinkou la kolèr, i kri apré li :
« Bous out bous, Tikok ! Alé fèr sak monmon la di azot !... Aristid va port manzé po zot, onz’èr. »…

Bann marmay i mont, i anbras zot matant, épi i komans travay... Mé, pa-sito fine onz’èr, Papa Tikok, Aristid, i ariv, i di azot i fo ardsann tout-suit ! « Pars, i di, na in laviyon la pas la kaz Tikarl, la port in zanfan po madanm Zilo ! In garson !... »
Alors, Tikok, dann son vilin manier, mé san fèr eksopré ! i di : « Laviyon-la, i fé proférans ! Bann Tikarl na déza sèt zanfan ! E nou, la kaz, na rienk amoin ek Zan-Lik (bas de page) tou-sèl !... »
Sépa kosa l’arivé, mé toudinkou, Mésié Aristid i vien rouz konm in kok, li fons desi Tikok, i pas ali in tapin dan la tèt ! « Sapré zanfan insolan, va !… »

Christian Fontaine