Manir kréol i di « bat si son lestoma » po di in moun i fé lo vayan, lo vantar, sa lé kab fé gingn aou dézagréman, sa ! Lé konm in kou, dann légliz, po son gran kominion ék son konfirmasion, Lévék i esplik bann Tikok, i di :
« L’Esprit Saint, mes enfants, on ne peut pas lo voir, on ne peut pas lo toucher, mais il est partout. »
Apréla, Monsényér i poz kestion po oir si zot la konpri, i di :
« Il est où lo Saint-Esprit ? »
Epi son doi i amont son tét. Alors, bann marmay i réponn :
« Dan nout tét ! »
– Bien Lévék i di. Mais où il est encore ? »
Epi li amont son kér.
« Dan nout kér » marmay i réponn paréy in voyaz ti zoizo.
Lévék i di :
« C’est bien mes enfants ! l’Esprit Saint est dans nos têtes : il est la lumière qui nous éclaire et qui dirige nos pensées vers lo Bon Dieu. L’Esprit Saint est dans nos cœurs, il faut aimer lo Bon Dieu et nos frères. Mais il est où, notre cœur ?
Marmay i bouz pa, i di pa arien. Lévék i arpoz lo kèstyon. Apréla li tous par koté son pilor*, li di :
« Notre cœur est dans… ? Il est dans notre… ? »
Tikok i lèv son doi, i réponn :
« dann nout lestoma !
– Dans quoi ? » lévèk i fé.
– Dann nout lestoma » Tikok i répèt.
« Koik ! Koik ! Koik ! Koik ! » Kaziman tout domoun i rir dann légliz. Ziska lévèk, dabitid i tienbo séryé, i lès sapé sapé1 osi son tour.
Tikok i konpran pa in merd po-koué i rir. Ariv son kaz, li pèrd pa la kart, li sa ogard dann diksionèr kréol. Li oi lé marké : « Lestoma : karkas lo zo èk lo miks i anpar lo kèr, lo pomon, tousala. » Tikok bandé sépa koman éster :
« Aspèr azot marmay, zot la ri amoin, zot. Domin m’a aminn diksionèr po zot, na oir kisa pli kouyon. »

Zour-la, Tikok té tro an-salèr, son manzé l’arèt si son lestoma.

Christian Fontaine