Di sak zot i vé, listoir d’ Frans ek listoir d’ la Rénion, sé dé ! Ogard in marmay konm Tikok : toultan li lé pri dan in trin si kestion d’ sak i espas laba ! Insi, si lé pa in lamayaz rant « La Bastille » ansanm « lo pasti », sé « la poitrine » ke Tikok i pran po « lestoma » ! Si lé pa « lo rapace » ki fé mazine Tikok in papang ki « pas é arpas », sé lo « flakon dori » ke lo marmay i rod port Dispansèr a la plas « un flacon d’urine » !…

Alors, tousala ? Akoz, Tikok lé bèt ? Non va, mé zami ! Li lé fité, fité, fité, lo pti kitsamèr ! Soman, konm mi di azot, n’in zafèr ki kol pa rant « nout zansèt ki sort tout landroi » !

Bon, pason ladsi é anon in ot kou lékol ansanm Tikok ! Dan la klas, s’kou-si, lo mèt-lékol la po rakont in morso "d’ l’histoire de France”. Li di sépa n’in boug té apel « Clovis ». Li lété « roi des Francs, fils de Childéric et de Basine, époux de Clothilde, vainqueur des Romains à Soissons ». An-ndanla, lo mèt i koz ankor « des Wisigoths, différents des Ostrogoths… du Vase des Soissons… du fier Sicambre qui reçoit lo baptême des mains de Saint-Rémy dans la cathédrale de Reims » é po fini l’ salad, lo mèt i aprann son zélèv « qu’à sa mort, lo royaume de Clovis fut divisé entre ses quatres fils : Thierry, Clodomir, Childebert et Clotaire ». Zot i pé èt sir ke Tikok i konpran pa in merd dan so "galimatia-la" ! Si telman k’ lo “galimatia” i tourn an “zanbrokal” dan son pti koko ! Akoz sa ? Akoz Tikok n’in granpèr i apel… Klovis ! É, konm fétespré, li lé marié dézyinm li ansanm in Madanm i apel… Klotid ! Anplis désa, Tikok na dé tonton : inn i port Klotèr, lot Klodomir ! Li na ankor son parin ki apel Rémi, é son kouzin : Sildébèr ! (I fo kroir Granpèr Klovis navé in liv Listoir d’ Frans si son tab-dé-nui !)

Po ansèv la sos*, « Sicambre… Roi des Francs… Thierry… Childéric… Basine… Vase de Soissons », tou-sa-la i fé mazine Tikok in zistoir an kouyon : n’in kou, son lot kouzin, Tiéri Sikanm, la vol larzan, la parti la boutik, la asté in domi mèt boudin, la manz tout li tou-sèl ! Ariv lo soir – initil di azot – [rod] Tiéri partou, oki ! Si la fin, lo pov Tiéri té blizé fé son bézoin dan in… basine, ke li la ranpli bor an bor, an parlan ! Alors, son bann frèr la komans moukat ali konmsa : « Sikanm, Sikanm-anbo, Batisfolio la ribanbèt ! Tiéri la sié dori sanm zanbéric, Tiéri la sié boudin dan son basine ! »…

Zot i oi in pé lamayaz ! Alors sa i form – konm nou la di – in zanbrokal dan la tèt Tikok. E lo marmay, i konpran pa koman lo mèt dékol, olèrk rakont « l’Histoire de France » – konm li di li minm – li rakont « Zistoir » si son fami ali Tikok ! Sa, devan tout kamarad lékol ! Sa lé pa po fé gingn ali la ont, in zafèr konmsa ?