Tikok lé apo vol dosik dann bifé ; son min i bit sanm lo karaf granmèr Tisia ; lo karaf i tonm atèr, i briz an morso ; tout lo mar i vers partou atèr ! Zan-Lik la vi. Li bat son min, li di : « Lav lav… ti koudav dav dav ! M’a di monmon ! »
Tikok i sa po ménas son gran frèr, bé, apré, li mazine, li di démyé pran lo marmay par santiman : « Di pa, Zan-Lik, mounoir ! M’a d’aou détroi balingo kan m’alé la boutik ! »
Zan-Lik lé bon po lo kondision, li di : « Mi di arpa ! »…

Ariv lo soir, granmèr i rant dann sal-a-manzé, i oi son karaf an mièt ék lo déliz mar tizann atér. Son ti-pé d’ san i fé in tour minm, li kri : « Kisa la fé sa ? »
Tout bann zanfan, in bann ti bèkroz, i réponn an mizik : « Pa moin ! Pa moin !… Pa moin !… ». Tikok dann ta bien sir !
« Alors lé konmsa, granmèr Tisia i fé an-foutan ! Daoir lo shat somanké la rouv také bifé po li vol dosik ! »
Kan i di sa, lo kèr Tikok i komans bat dann son do ! Zafèr i gat ankor plis kan granmèr Tisia i asèv, i di : « Lé bon ! M’a trap lo bénit, m’a fé boir tout la bann sakinn son tour. M’a oir si lo shat la kas mon karaf ! » 
Granmèr Tisia i sar koté loratoir po vréman, i trap lo ti miské lo bénit Sint-Espri ; i kri tout la bann marmay, i di : « Alé ! Sakinn va boir in pé ! Sélis ke la pa fé arien, lo bénit i fé arpa li arien ! Soman sélis ke la fé, pangar po li !… »
Odil i boir inn gorzé konm si rien-nété ; Férié i pas, i boir ; Zan-Lik i pas, i boir… Ariv lo tour Tikok, son kèr i rod po pété, son ki i komans moul poiv ! Soman, li trap lo ti flakon ; ariv po port koté son bous, tout son kor i gingn la tranblad ; Tikok i yabou pi ténir, largé in gropléré :
« Pardon, granmèr ! Prosinn foi, mi fé arpi ! »
Lo marmay té fé si-tan pityé, granmèr Tisia la pa fé ali arien !

Christian Fontaine