Tikok, zanfan-d’kèr ! Dék granmèr Tisia la koni la nouvel, tout-suit el la parti oir Manmzel Fifi, lo sakristine lo prèt. Manmzel Fifi la amont ali tout lo bann soutane. Granmèr Tisia la anprèt inn po pran modèl dési. Apréla, la roparti la kaz, la rouv son larmoir, la pran son ptit katsou salaryé antortiyé dann in té-d’oryé, la dsann magazin zarab, la, la asté troi mèt la toil rouz po la soutane, ansanm dé mèt la toil blan — san konté lo dantel — po fé lo sirpli. An parlan d’ sirpli, i prétan, na in kou, in zanfan-d’kèr la pran lo sirpli po in “sirplis” : li té kalkil so pti linz-la té an tro ! I fék li la fout sa laba, li la pa vouli mèt desi li ! Lézot zanfan-d’kèr la parti raport sa ansanm lo prèt. Lo prèt la dni, la di lo marmay i fo mèt son sirpli ! Alors, lo marmay la obéï. Soman, olerk mèt son sirpli desi son soutane, li la mèt andsou ! Li lavé pran sa po in zipon fanm ke té falé mèt sou la rob !… Rozman k’ so zistoir-la la pa ariv Tikok ! Soman, la ariv ali in ot afèr. Oila :

Kan l’ariv lo zour po Tikok mézir son linz zanfan-d’kèr, lavé konm in fèt la kaz bann Biganbé. Tout la fami lété la, san konté lo bann voizin, lo bann kouzin-kouzine, tout la klik ! Lo ptit linz té va bien desi Tikok. Matant Anria té la soman : « Bin voui, ma fi Tisia ! Vou na ankor d’ bonn min, é d’ bon zié. La ptit rob ansanm la ptit kamizol lé zis konmkifo ! ».
Madanm Robèr té rovir son koté : « Ou i pé dir, Anria ! Tikok i rosanm ziska in pti prèt an-ndan-la ! »
As-moman-la, granmèr Tisia i profit po lèv la tèt. Li ogard bien tout la bann ozalantour, dousman… dousman… Apréla, granmèr Tisia i profit poz son dé min desi la tèt Tikok, el i fé son prédikasion :
« Tikok, mon ptit zanfan ! Obli pa zamé sak gran-mèr i sa di aou : out gran-pèr té in gran rolizié. Moin-minm, out gran-mèr, mi voulé rant sèr ; soman, la misèr té tro for, an-s’tan-la, i fék papa-monmon la pa gingn mèt amoin lékol. Out monmon té blizé kité. Zordi, Tikok, oila ou : zanfan-d’kèr ! Ebin aou po sov lonèr ! Alors, oubli pa : rès dan la rolizion ! »

Promié foi, Tikok té antann son granmèr koz konmsa ! Dabitid, son kozman té séryé osi. Soman, la té plis for k’ toultan ! Osi, kozman-la té devé rès Tikok an mémoir…

Christian Fontaine