Ièr-o-soir, lésié sarèt la rod kasé. Rozman, Grozil Fèrbèf lété la, la gagn aranzé ! Sak i fé k’ Gramoun Biganbé ek Zan-Lik la lèv gran-matin, so matin, la parti sarz kann...

Tikok, li, li doi rant lékol uit èr ! Mé, li osi, la fali li lèv bon-èr po fé inn-dé korvé : saroy lo, rod do-boi, donn manzé poul… Po linstan, li lé asiz koté l’ fé po fé sof lo restan d’ri la resté la vèy. Son monmon, a koté, i fé koul kafé – kafé nouvo –, é tazantan i fé in nti roprimandasion son garson :
« Tikok, mon anfan ! Mèt pa tro piman dann manzé-sofé ! Ou i koné ot lestoma i siport pa tout kalité zingrédian ! »…

Tikok i di « oui », mé, dèk son monmon i vir l’ do, li mèt in bel gob piman dan la marmit pars Tikok i mazine dan son kèr :
« La zourné lékol lé long… Manzé la kantine lé pa bon… Koman m’a fé si mon ri-sofé na poin n’ gou ?... »

Christian Fontaine