Moi d désanm, sa lé gadianm ! Moi d désanm, tout zafèr i pèt an flèr : flanboiyan i mèt de-fé dann kèr pié-d’boi vèr ; zakaranda, Tanpon, i déroul tapi blé-mov po kardinal rouz fé lamour an-ndan ! A oui ! Tikok i inm moi d désanm-la !... moi d désanm, sa lé gadianm ! Granmatin, zoizo-bélié, moino, bèk-roz… i di bonzour lo solèy k’i prézant ! Solèy lé fièr dann moi d désanm, lo roi lé pa son kouzin ! Li fé kour la fré dan lé o, li fé kour marmay dann basin dlo ! Bann sarèt – sad Gramoun Biganbé ansanm – la pa atann lo zour kléré po fé zot prièr : zot i kri, zot i grins dann somin makadanm. Le bèf devan : o pa kadansé ! Sé la koup dann moi d désanm ! La koup, léspoir bann plantèr ! La koup, zot doulèr ! La koup kann ! Kann po sisé, bann marmay i kalkil, Tikok an promié !...
Moi d désanm, sa lé gadianm ! Sézon létsi ; sézon mang, sézon zanana ! A oui, le frui nana dann moi d désanm-la ! Zanvié, févrié, mars, avril… an-diré tousala la sakrifié azot po aminn moi d désanm-la ! Konm in fanm an voi-d-fami i atann nèf moi po fé zanfan, moi d désanm i fé zanfan po le onz moi k’i vien avan ! Zanvié, févrié, mars, avril… onz marsh leskalié ; dann moi d désanm, n’i ariv o somé, n’i ramas la rékol ! E Tikok lé la, dan l’ta…
Pars Tikok i inm moi d désanm-la ! Tikok i inm, pars, an plis tout sa, la fèt i roul dann so moi-la ! La fèt Vin-Désanm, in Vin-Désanm kont lesklavaz, kont la mizèr ! … Tikok i inm moi d désanm-la, pars, an plis tousa-la, Noèl i vien dann so moi-la ! Noèl, Noèl : léspoir zanfan maléré ! Noèl dann moi d désanm ? Flanboiyan dann brouyar, fanal dann fé-noir ! Noèl dann moi d désanm la Rénion, sa lé gadianm !... Tikok i atann moi d désanm !...

Christian Fontaine