Apré lo Vin Désanm, Tikok la pran lo gou : li la form in lespès lorkès, é, tou-lé-zour, kamarad i réini son kaz po zoué la mizik ansanm. Anfin ! N’i apel sa "la mizik" soman Mdanm Biganbé i apel sa "dézord", el ! Pars i fo oir lo bann trin bann marmay-la i anserv po zot mizik !

Ou na Vant-koupé ek son kordéon-a-bous i mank kat-sink dan ansanm ! Ou na Tipol ek son flit-papay k’i fo ranplasé a-sak-estan ! Tapioka, li, li lé fièr d’ son tronpèt-soka é kan lo voil lo soka i désir, Tapioka i pran in pingn sové, li anroul in papié glasé par dsi, é ali « fiout !… fiout !… fiout !… », li anvoy pou sa-minm ! Taka Grozil, Zan-Lik ek Tikok, azot, i okip la batri ! Tikok, po sa par, i pran in kastrol, é la « badanm !… badanm !… badanm !… », li bat dési ek tout son kouraz !…

Promié débi – konm nou la di – Madanm Biganbé té pa tro satisfé d’ sa. Granmèr Tisia, koz pi ! El té kri toultan : « Marmay, sort dovan la port ! Alé fé zot vakarm dann fon la kour ! Isi lé pa kafarnaom, isi ! ». Soman, apréla, konm Tikok té antisé minm ek son mizik, lé dé la fé in sor*, la rézinié ! Kontrèr ! Kan l’ariv Noèl, konm lé dé té koné pokor kosa di* Pèr Noèl aport po lo marmay, zot la désidé d’ asosié, asté in tanbour po Tikok !… Mazine azot koman Tikok té kontan, dék lo matin 20 Désanm, li la vi, sou son zoryé, son tanbour la po-bèf ! Lo roi té pa son kouzin !…