Tikok navé uit-an par la. Na in kou, li sa konfésé li di :
« Mon Pèr, mi akiz aou* : moin la vol do-sik, moin la tap mon nti frèr, moin la dézobéisé mon monmon. Moin la ziré osi, moin la di : bèz ton… »
– Ah non ! non ! mon enfant ! lo prèt i di. Ne répète pas les jurons, surtout !… Continue à dire tes péchés.
– Mon pèr, moin la fé in krim… »
– Un crime ? ? ? lo prèt i domann. Mais quel crime, mon petit ?
– Moin la tié in kamaléon ! Tikok i arvir.
– Ah bon, je préfère ça ! lo pèr i fé. »
E, an-mim-tan, li dégaz son lestoma po respir in bon kou !…

Apré-sa, kan Tikok la fine di ali « sé tou, mon Pèr », é résit son lak-dé-kontrision, prèt-la i dmann ali :
« Est-ce que tu fais régulièrement tes prières, mon grand ?
– Oui, mon Pèr ! » (Ousa ! Mentèr, ou ! Madanm Biganbé, lé vré, i fé di ali son "Notro-Pèr Zé-vou-Sali-Marie", kan li lé fine lav son pié, lo soir ! Mé, lo matin, el na poin lo tan ek sa, el !) Soman, Tikok i di « oui » po pa k’ lo prèt i angrinn ali !
Alors, lo prèt i fé ali in konpliman, i di : « C’est bien, mon fils ! Il faut persévérer ! »
« PERSEVERER » ! sa in mo Fransé i vé di aou : « kontinié, dékouraz pa !… ». Soman, Tikok i konpran pa sa, li ! La kaz, son papa na in koson i apel « VÉRÉ ». Alors, Tikok i kroi lo prèt la di ali : « i fo persé Véré ! », otroman di « pik koson-la ! »
« Kosa ? Tikok i mazine alors dan son kèr. I fo mi tié koson papa ? Tousa po la pène moin la tié in kamaléon ? A non ! Pénitence prèt-la lé tro for, kanminm la di ! »
Rozman, ariv son kaz, Tikok la rakont sa Madanm Biganbé. Alors son monmon la esplik ali lo zafèr ! La évit ali « persé véré », é… gingn son totosman ek Gramoun Biganbé !… A oui, Mon-dié ! Kan ou lé pti, ou lé… pa gran !

Christian Fontaine