Tout zafèr paré, Biganbé i komann « Irk, ouo, i ! ». Tanbi, lo bèf, i démar ! Tan-k nana plato o-sinon-sa la désant, bèf-la i donn lo grin ! Soman, i amiz pa i ariv la pant Saladin ! A-s’moman-la, lo « klok klok » lo sarèt i larg lo batman séga po kas an boléro ! Sé konm-k’i-diré : li sa pli dousman ! Tanbi, sou son zouk, la bav i komans koulé ! Son tèt i komans vir droit-gos ! Son pat i komans aras zerb, kan i fé pa vol galé par koté ! Granmoun Biganbé na bo kriyé « ouo a i ! », rien a fèr ! Bèf-la i an-pé pi minm !…

D’anlèr lo sarèt, Tikok i komans pran pitié. Li dmann an li-minm koman fé po soulaz lo pov Tanbi ! Momandoné, in lidé i pas dan son lespri : « Paké lé tro lour po li ! Atann m’a èd ali ! » Alors la, li pran in tant maï, li débat po mèt desi son tèt ; apréla, li dobout avek, par an nsi le bal maï ! (1)… Gramoun Biganbé, promié débi, la pa romark son zès. Moman-doné, poitan, li sort koté brankar, li pas par déryèr po oir si laryaz lé bien déséré, li oi Tikok dobout anlèr lo sarèt, lo tant maï desi son tèt !

« Mé kosa ou i fé la, mounoir ? »
– Bin, papa ! Oui oi pa Tanbi lé fatigé ? Moin la kalkil soulaz ali in pé ! »…
Granmoun Biganbé la pi gingn di aryin, la rèt la an plan ! Mé dan son kèr, li la maziné :
« Bondié Ségnèr (2) ! Kansa mon garson va vni in moun ? Lu na bonn volonté, mé lespri lé ankor fermé ! »…

Christian Fontaine

(1) ???
(2) I trouv ossi : Sinyèr ; Sénièr ; Sin-yèr (konm, souvandéfoi té i prononse lontan).