Gramoune Biganbé ek Zan-Lik i déboul minm an dsandan ! Tikok, déryér, i suiv azot ek pène ! Sirtou apré lo kou-d’kongn li la gingné anba la Pant-Mang ! Ek sa, son paké lé lour, é, minm si li la mèt in zik siendan déryér son zorèy, li apersoi la fatig !... Dann somin, zot i kroiz Zilo-l’Zèf. Zilo i fis an montan, son panié d’volay desi son tèt, son tant zèf dan son min. Konm dabitid, Gramoune Biganbé i koz ek li, i di :
« Alors, Zilo ! La vant, daoir lété pa tro for, zordi ? »
– Koman ou i vé osi ek in mové tan konmsa !... La radio i vien d’anons in siklonn karabiné, la ! »
Gramoun Biganbé i di soman : « A bon ? »
Apréla, li pas an ségonn ; sé konm k’i diré, li mars pli vit ankor ! E sa, i aranz pa lo pov Tikok déryér !...

Desi le zantrofèt, in rafal do van i lév toudinkou, i fout lo paké Tikok atèr ! Tikok i bès po ramasé, mé oila pa k’in gro grin-d’pli i ariv an tronm !
« Monmon : la pli ! » Zan-Lik i kri. E li sé-d’ doub son papa po kouri !
– Anon vitman, Tikok ! », Biganbé i kri.
Tikok i anprofit po lès son paké atèr, po kouri ek lézot.
Ariv an-ba zot kaz, tranpé konm kanar. Zot i oi Madanm Biganbé l’apo vni fol po ramas son volay ek son fanzon*-d’flèr. Déza, bann pié-d’boi, ozalantour, i kri « tir ». Laba, la tol park-koson i komans grinsé !
« Ed amoin, Zan-Lik ! Madanm Biganbé i di .
– Mé non, Marie (1) ! lo vié i arvir. I fo Zan-Lik i vien èd amoin klout le bar desi la port la kaz !”
– Bin Tikok, alors !
– Mé non ! I fo Tikok i sa sanz la zénis plas, pangar el i may ek lo pié-d’sapot ! »

Madanm Biganbé i énerv : « Lès amoin krèv tou-sèl alors !... E kisa va alé asté la bouzi, la boutik, talèr ? Amoin minm ?... Ankor, na poin rien k la bouzi i mank : de-sik na pi ! La mori na pi ! Kafé na pi !... »
– Mé pa bézoin d’ kriy konmsa, Marie !... Nora l’tan d’ ramas tout avan lo gro van i ariv ! Po la boutik, m’alé talèr !... Alé Tikok ! Démar la zénis, amar kont la kuizine ! Apré sa, alé èd ot monmon ramas le poul ! »…

(à suivre)

Christian Fontaine

(1) Le nom Madanm Biganbé