Dan lé o, lontan, bann plantèr navé poin révey. I fék, po konèt lèr, zot té « travay » si in sièt*1 zafèr. Gramoun Biganbé, sirtou, lété for po sa ! Insi, la nuit, li té akout : Gran-mèr-kal i fé :
« Tout ! Tout ! Mi vé tout ! » ? Gramoun Biganbé i di aou : « Lé minui ! »
Promié kok i sant ? « Lé katr’èr ! »
Sarèt Ton Zil i pas : « Glan ! Glan ! Glan !… Irk kouo i i » – « Lé lèr po lévé, po sof kafé !… »
La zourné, parèy ! Gramoun Biganbé té di lèr ninport kan, é an ninport kel fason : lé minit, ek lé ségone*, li té di ! Lo sistinm lo pli fasil po sa, lété d’ ogard solèy ek lonbraz la kaz !
Aforstan vèy son papa, Tikok-si la dni a bou d’ aprann !

In zour, lékol, zistoman, lo mèt té apo esplik in nafèr. Konm fét-espré, la léson té parl « la terre tourne autour du soleil ». Tikok i akout bien, mé li konpran pa tro ! Tikok i kalkil minm, li trouv pa l’bout !… Moman doné, Mésié Edgar i kri apré li, i di : « Tikok ! Toujours dans la lune ? … Eh bien, redescends, et dis-moi où se trouve lo soleil ? … »
Dépi tèr-la, Tikok i oi in klerté i sort par koté la fénèt, i klèr a tèr koté tablo. O milié, na in biro, é biro-la i bar la klerté, i fé in lonbraz atèr… Alors, Tikok i amont la klerté ek son doi, i di :
« Oila lo soley, msié ! »
– Quoi ? Mésié Edgar i rovir, c’est par terre que tu places lo soleil, toi ?
– Bin oui, Msié ! Sé papa la amont amoin ! »
Tout marmay i rir dan la klas, mé Mésié Edgar i rir pa, li ! La fou in zok* dan la tèt Tikok ! Marmay-la la vi zéklér i di aou !… Dépi stan-la, Tikok i kontinié pran lèr ek soley. Soman, li koné soley-la lé anlèr, mé pa atèr konm li té i kroi !
Atèr-la, sé lé « reflets du soleil », konm dann liv, i di !…