Tikok ek Tikarl na poin dé kamarad i antann bien konmsa ! Kisoi la pli i tonm, kisoi solèy i flanm, zot i mars toultan ansanm konm sousout ek la mori* ! Soman, lé dé na poin minm tanpéraman. Tikarl na plis lo teknik po aranz in kéksoz, mé li tir zamé lo plan kan li antropran son nafér. Tikok, li lé plis grodoi, mé li bat son kalkil avan.

In n’ot diférans : lo kér Tikok i rosanm lé pli tann sad Tikarl. Fé in sipozision toulédé i oi in kardinal bien rouz, Tikarl i anbaras pa dir : « In bon fritir èk sa sré pa kouyon, ou i koné, ou ? ». Tikok, li, la pa sa li va di : « Oté, Tikarl ! In krim tyé sa, lé tro zoli ! » Ek sa, Tikok lé kab admir kardinal-la inn zourné san rasazyé !

Oui, Tikok lé fonnkézèr osi, kan li vé ! In zour, li trouv Tikarl, li di : « Granmatin kan la rozé i aroz, lèr soley i bri dann karo zerb roz, mi yinm akout bélyé, titoulit* ék zwazo békroz ! Zot i mét la poz*, zot i koz. Zot kozman lé pli dou lo grin margoz… Lo soir, kan mi rant la kaz, mi yinm santi la briz, la briz i fé vag dann karo vétiver…  »

Tikarl i lés pa li asévé, i di anfoutan : «  Tamèr ! Ou lé pli for Mésié Kalvèr, li fé d'vèr an plin èr sou pié galabèr ! » Ek sa, li atér po ri ! Tikok osi i rir. Apréla, zot i mét la min si lépol linnélot po fé kamarad, zot i sant ansanm : « Je suis crétin, tous les matins, mi manz boudin ek ti pin !  »… La pa bézoin plis po kontant nout dé konpèr !