La pli la tonbé, ravine la koulé, basin-Tizan la ranpli. Tikok i kalkil somanké Tikarl va dni kri ali po alé bin-yé. Tikarl-la, sé son pli gran kamarad. Zot dé i sa lékol ansanm. Soman, Tikarl i mank lékol bonpé, par-rapor li na in pon-yé 1 frèr-sèr po véyé, kan son monmon i sa travay.
Tikok i mazine osi sad Tikarl la di ali lot-kou, li di :
« Monmon ! Bin, pokoué zot-dé papa i di pa Tikarl vien rèt nout kaz ? Na la plass ! Va mèt ali koté moin. Li va dor dann koin, m’a dor dann bor !… In ! Monmon ? »
Monmon Tikok i pran in morso kasia*, i bour sou d’fé, i di :
« Mondié Tikok ! Asé touamante* 2 amoin. Moin la fine di sa ! Ou koné pa ti sèr Tikarl lé toultan malad, i fo li vèy ?
– Bin Monmon, aminn ael si 3 ! »
– Koué ? Ou i oi pa n’i ien pi bou viv ek sad nou nana ? … Alé, manz out lanmsim, rès trankil, don !… »
Tikok i gingn pa manzé. Li mazine la kaz Tikarl i koul, i fo saroy* do-lo, vèy marmay, tousala…
Momandoné, li anprofit son monmon la vir’ do, li sèr in bout lanmsim dan son pos kilot ! Apré sa, li di :
« O Monmon ! Mi sava rod mon liv kalkil la kaz Mariis !…
– Alé mounoir ! Mé, rant pa tro tar, in ! »…
Tikok i atann pa ki-pèr ki-gingn*, li koup dann karo kann, é li fons koté la kaz… Tikarl ! Son monmon la vi tout son zé, el i koné li la parti port lanmsim po Tikarl.
Mé el la fine abitié, el i fé pa in konte !…

Notes :
1 Prononse : pon-yé
2 Tourmante.
3 ossi.