Kréol i inm donn lo moun ti non gaté. Insi, dann lékol ousa Tikok i lé, tout marmay na sakinn son nti non : na inn i apel Robèr Sanpié ; l'ot : Popol Ni-d'poul ; in ot : Litoine Legri* ; na ziska inn, marmay i kri ali Anni Siko-t'pip* !… Tikok, li, son vré non, sé : Emilien 1 Biganbé, mé pokoué i apel ali « Tikok » ? Sé parské, étan-mti, li té inm batay bon-pé, lékol. Té falé pa in mous té poz si li ! Li té siport pa, sirtou, kan in pli gran té anprofit* si in pli pti !… A sak rékréasion, si navé in batay par la, ou i pé konté : Emilien té la ! Osi, in zour, la métrès-lékol la mèt si son karné-d'not : « Elève travailleur, mais aussi : petit coq batailleur ! ». La métrès la lir sa for dovan tout la klas. Tout marmay la ri… Sé pou sa, dopi so zour-la, tout la bann i apel Emilien « Tikok »…