Na-défoi, lespri marmay lé an boutey ! Amoink zot i inm fé l’ bèt minm !… Lé konm, n’in kou Tikok ek Ti-Pier la po kozé, i arkont sakinn zot rèv. Ti-Pier i di sépa, dan la nuit avansa, li la rèv li t’apo bin-yé dann Basin-Pizon. La pli la tonbé, la ravine la dsann, dolo la ral ali, ral ali, ral ali ziska la mer ! La, li la nazé, nazé, nazé ziskatan-k… son rèv la fini ! Ti-Pier la lèv asiz, drèt desi son li ! Son rèv lavé rèt sèk ! Soman, l’ payas, li, lété mouyé ek… pisa !
Tikok i rir lo manièr Ti-Pier i arkont sa ! E ali osi, son tour, li arkont koman, n’in soir, li la rèv bébèt té vyin souk ali ! Té in gro bébèt, té rosanm in bèf. Soman, la korn té bel, bel minm ! Taka la ké, té may dann pié-d’boi, si telman té long !… Bébèt-la i fons déryèr Tikok ! Tikok i kour, i kour, i kour tout son kouraz ! Si telman k’ li artrouv ali… atèr, an ba d’ son li !
« Mi rolèv, Tikok i di, mi rorant sou mon kouvert, mon tèt sou mon zoryé ! Transpirasion n’ mor i koul gro konmsa tsi moin !… Mi ésey rodormi, o ki ! I gingn pa ! Anfin, koman-koman, somey i vyin, mi dor !… In nestan apré, kosa mi rooi dvan moin ? Lo minm Bébèt ! Soman, la ! Pli vilin ankor ! La ké pli long, la korn pli pointi !… Mi kour, mi kour, mi kour ! Toudinkou, boudoudoum ! Amoin atèr, koté po-d’sanm ! »
– Ou la rolvé ? » Ti-Pier i dmann.
– Bien sir moin la rolvé ! Tikok i arvir. E li azout : Rozman moin la rolvé ! Sansa, moin té kap*1 rotonm desi moin, si moin té rèv ankor !… »

Christian Fontaine