Tikok la lèv bonèr, so matin la. Li la dégaz vitman po alé lékol. La fré té i lèv déor. Li la mèt
palto Zanlik po rod manzé lapin, avan binyé. Son min té zonn forstan ras zerb pikpik ek
kolkol. Son métrès, sakéstan, té i dispit apré li, akoz son zong té krouté. Li lavé ont. Tazantan,
kan li té fine graté, donn manzé bèf… tousa, li té i pren koton mai son monmon té i anserv po
lav linz ansanm, lité i frot son po, téfé ni roz konm sad son métrès. Po asèv la dès, marmay
lékol té i ravaz ali : « Tigri, Tigri ! » osinonsa « oté, gardyin volkan ! » akoz son figir té plin
kodinn. Son sové té i flanm dofé povréman.
Son métrès té i yinù ali, akoz li té aprann byin. Li té giny pa pa ogard lo zoli ti min apo ékri si
tablo-la ! Son kaz napwin personn navé in po konmsa ! Li té mazine son zong plin la tér, son
dwadpyé té i giny koudkony dann ros, dann siko kann, tousala… kan li té kalkil sa, son kolèr
té i mont.
Pokwé son min té pa prop konm té i fo ? Trozour, li té po lav son zong, son gramoun la kri ali
po rod zakasi po koson. Kwé ou vé li fé ? Li té i konpran pa…

Christian Fontaine