Toultan, po lé vakans, Tikok i sa Sin-Zozèf, la kaz sa matant Tonia. Na in kou, Tonia i di ali :
« Tikok, mon kaf, rann in servis matant, don ! Oila dé lit ; alé sers do-lé ek kouzin Robertis laba Karos ! »

Tikok i di : « Oui, matant, m’a partir ! »
Mé apré sa, li mazine in kou : « Karos ? Mé lé loin, sa ! Na plis kat kilomèt, minm kan i koup par lé santié ! »

Tikok la pa anvi d’alé ! Alors, li kalkil in plan : li trap lo soubik ék lé dé lit, é li komans marsé an… boitan ! Kan son matant i dmann ali : « Kosa l’arivé », li réponn ek in lèr fé-pitié : « Moin la tonbé, mon pié la démi ! » Alors, matant Tonia i di ali :

« Bin, oila karant fran, pran lo kar, plito ! Vin fran po alé, vin fran po rotourné ! – Mersi matant ! » i di Tikok, é mank in pé li obli fé semblan n’boité, telman li lé kontan !… »

Ariv devan bazar, Tikok i pran lo kar nèv-èr é « vronm vronm, bi i i ip ! » : lo kar kourandèr* i démar ! Tikok lé fièr d' li ; li ogard partou ozalentour : lo pon la Rivièr-dé-Ranpar, karo sonz-gri laba Bitor, la mer dann fon Manapany… Tousala lé bien zoli !

Soman, moman doné, lo kèr Tikok i bat dan son do ! Mon dié ! Lo kar la fine désot lo somin « Carosse, la Plaine des Grègues » : li bour lo fer si Sin-Pier. Alors, Tikok i fout a pléré ! Kontrolèr i vien, i dmann ali : « Kosa la rivé ? » Li esplik son ka. Kontrolèr i di ali : « kas pa la tèt, mounoir ! M'a mont aou inn-ot somin po Karos ! » Apré sa, lo kontrolèr i fé arèt lo kar la kroizé « La Petite-île », é di ali : « Mont aou par la ! ou va trouv Karos !… »

Oui, bien sir, Tikok la riv Karos. Soman a… troi-z-èr laprémidi ! Ek in pié té fé mal soidizan, li lavé dni-a-bou travers par « La Ravine du Pont, lo radier des Grègues, les Lianes », tousala ! Kan la riv la kaz kouzin Robertis, li la bi in lit do-lo an antié !

Osi, Tikok, apré sa, la di : « Zamé, mi ramas arpi mantèr*, moin ! »
E po fini, li la rodsann Sin-Zozèf… a pié ! Ek lo 20 fran, li la asté pasti* dann somin…