Po la grann kominion son garson, Madanm Biganbé la asté in pèr soulié verni ansanm in pèr sokèt maron, in somiz kol-marin, épi in gran kilot blé ek in zoli sintiron an kuir. Tikok té karnèr ! Té falé oir ali marsé, son brasar dan son bra, son siez-an-dantel dan inn min, épi, dan lot son livdomès « kouvertir an nor » ! Lo roi té pa son kouzin ! Tanka po son silip, Tikok té an rovien pa ! Lo maléré silip, tro séré, té koup son déryèr, mé rien ! Té promié foi Tikok té mèt in kilot-désou, é sa i montré li té pi in marmay ! Li té gran, astèr !...

Soman, po lo zour son kominion solanel, Tikok noré pi san pasé fé sat li la fé ! Akoz ? Kosa la rivé don ? E bin, oila : Madanm Biganbé lavé pran la pène mèt 500 F – larzan lontan – dan in lanvlop, po li mèt la kèt. E bin, olèrd mèt lo larzan dan lo panié la kèt konm tou lé zot, lo pti fanngars la trouv moyen glis in lanvlop vid ! Li lavé désir lo lanvlop é ramas lo 500 F po asté sorbé !... Sapré Tikok, va ! Rozman son monmon la pa koni ! Sinon té koup son déryèr plis ke lo… silip ankor !

Christian Fontaine