Forstan koz « Tikok ek Zan-Lik » dann nout zistoir, astèr n’in-pé i kroi Tikok na zis in frèr minm, parèy désertin fami ris na riyink dé zanfan ! Aléoir, ou ! Tikok na in tralé frèr-sèr. Si-tèlman, na d’dégré li lé oblizé kont dési son doi-d’pié po donn aou la kantité.

Madanm Biganbé la gingn 12 zanfan 1 suit-an-suit* konmsa, lané po lané. Na dé la mor tanmti, i arèt 10. Lerk ou pran leskalié anlèr ou désann ou i trouv : Maryot, Arsinn, Odil, Férié, Zilyinn, Zan-Lik, Zanpir (ali minm Tikok), Mariz, Zandark ek Zoni. Promié débi – n’i romark – partaz té bien kalkilé : in fi, in garson. Apréla, èk Tikok dann milié, épi Zoni dann dernié bout, lo sirkui la mayé. Dé garson an-suivan sak kou, séfé banna i apèl Tikok èk Zoni dé « ti fi manké ».

In l’ot zafèr si bann Biganbé ; pokoué i apèl Férié èk Zandark konmsa-la ? E bin lèrk banna la éné, gromèr Tisia la gèt dann lalmanak. Férié la éné in lindi d’Pak. Li la vi té marké Férié, la kalkil sa in sin, la donn lo non son ti zanfan. Po Zandark, minm to. Li la éné in 13 mé, dann lalmanak lé marké : Ste Jean. D’Arc. Li la bour Zandark po son ti garson.

Po arni* azot, si nou la koz arienk Tikok èk Zan-Lik ziskalèr, sé po la rézon, dann fami-la, tout i mars par pèr. Sak pèr na son moun po li frékanté osi. Maryot èk Odil lé toultan ansanm, épi zot i sa kas la blag sanm zot kamarad la Konsésion : Zosline, Marilis, Matid… Arsinn èk Férié zot, zot i inm la pès toultan, ou’a trouv azot bor-la-mèr èk Zanpol, Moris, Sizibèr, Roklor, tousa-la. Na-d’lèr osi, i prétan dir, zot té i fé lo vèr* dann somin ek ti fi. Zilyinn li, lé sitelman koinsé rant dé garson, li artonm oblizé zoué èk son ti sèr Mariz, épi okip lo dé ti dernié : Zandark èk Zoni. Epi po fini, dann milié : Zan-Lik ek Tikok, parèy dé poto-d’kaz : « lo dé pli dané » konm di Madanm Biganbé. Zot kamarad : Tipol, Grozil, Tapioka, Vant-koupé, Mistigri ; in bonpé marmay té malizé* grandi. Po zot bonèr, épi po la danasion zot fami !