In zour, Tikok i sava rod zerb dann la ravine. La pli lavé tonbé dépi dé-troi zour, ti basin dlo té sal, alors navé bonpé moustik. Sakéstan (1) moustik té i pik Tikok. Li té fouti po rod son zerb. Li sé-d’ armont son kaz, anfil in pantalon (2) desi li ék in somiz gran mans, épi li sé-d’ artourn la ravine pou kontinié rod son zerb. Bé, moustik-la té pli fité, sa té i tourn koté son tét, té i ronf dann son zorey, té i pik son figir. Li té dé (3) foi pli bézé ; èk sa, zerb té i antas pa !
Li asiz desi in ros, li réflési pou trouv in fason rod zerb san fé pik ali. An somin, li oi in sasé, in lidé i zerm dan son tét : trapé lo sasé, persé dé trou dédan, anfilé desi son tét. Soman, békalinèt ! moustik pli fité ke li minm ; zot i rant par lé dé trou, i pik son gèl.
Li sé-d’ zèt lo sasé, armont son kaz rod in laparey pou tié moustik — zot i koné zafèr anroulé konm serpan-la. Li mèt sapo desi son tét, li instal lo laparey desi, épi li ardsann la ravine. Dann somin son bann kamarad i kri apré li :
« Oté Tikok, sasèr moustik ! Oté tonton moustiko ! Té Tikok, ou nana permi pou sas zanimo-la ! »
Tikok la pa konpri arien, li té fine obli le zafèr, li kontinié son somin. Dann la ravine, li rod son zerb. Anmar lo paké ! Mét sou son bra, mont son kaz ; le zafèr desi son tét minm. Zan-Lik i oi sa, i mét-a-rir. Lo papa, ke l’apou aranz in park poul, i oi pa arien, i di : « Zan-Lik ! Arèt annuir out frér ». Mé Zan-Lik i arèt pa. Lo papa i vien po bèz ali. Li oi Tikok : ali osi atèr po ri. Tikok i tir son sapo, i sar di son monmon, son monmon osi i anvoy ali zoué kanèt.
Lo tar fine rantré, lo monmon i anvoy Tikok trap laparey moustik. Zan-Lik i armoukat* : « Po-kosa ! La pa bézoin, Tikok in bon sasèr, li ! »

Christian Fontaine

(1) En permanence.
(2) Té i di ossi : in kilote gran-mansh.
(3) Fr. deux.