Na dé-troi kamarad té i oi pi Zistoir Tikok dann Témoinyaz Krétien ; zot té trakasé. La parti oir in kou Direktèr zournal, la mann ali, la di : « Té, Pèr PAYET ! Kosa l’ariv Tikok, don ? La déviré* ? Lé mor ? La désot la mèr ? Koué k’ sé li ? »
Pèr PAYET la kal azot, la di :
« Non va, marmay ! La pa mor, li ! La pa déviré osi ! Soman zot i koné Tikok, sa in marmay siklotomik.
– Siklo… ti ki ? na inn la di.
– A bon ! Tikok lé malad, alors ! Di anou in kou, va, Pèr PAYET, "siklotimik-la" lé grav ? I sava doktèr pou sa ?
– Non, va, kamarad ! Siklotimik i vé dir aou : Tikok lé koman tonbé-lévé*, in zour lé bon, in zour la pi bon ! In zour li donn paké minm, li alim do-fé, in zour li fé arienk… la fimé ! Zordi : li sant, li dans, li rir an ponplémous ; domin, li lé an-ta, an-zibou* dann in koin ! »
– A, oui ! Mi oi astèr ! (in kamarad té pokor kozé ziskalèr i arvir son tour). « Lé konm kidiré zordi Tikok i fé léo èk léba… par léplinn. Na dégré li lé anlèr ranpar, na d’lèr, li glis dann fon ravine. Amoin osi moin na in tanpéraman konmsa. Mounoir ! Lèrk moin lé anlèr, lé bon. Soman si la di aou moin lé dann fon osi, la ! Avaz p’amoin, avaz p’amoin : mi mord ! Anfin ! Si moin lé an otèr mord. Pars lèrk moin lé konmsa-la dann fon, mi tonm pli fay la fayté*… Apréla alé di riyink bann fi na d’ règ ! »

Toudinkou, Tikok (li té po akout azot par la fénèt) i déboul par la port, i rir, i di :
« Aba ! La moin la trapé, la ! Zot i koz, koz minm dési mon do, la ! In ? Moin lé sikolotmik ? Tazantan anlèr ranpar ; par kou mi adbout dann fon ravine ? Ebin, dann fon ravine-la, kroir pa Bibi i perd son tan touzour, li ! Bibi i kalkil : mi agèt koman do-lo i pik somin la mèr, koman kozman zoizo i mont la foré. Parlfèt mi agèt tournéviré la vi. Mi rod pli gayar santyé néna po armont anlèr ranpar !
– Ou la fine trouvé ?, na inn i domann.
– Moin la trouvé minm ! Ou’a dmandé ! I amiz pa, zot i sa rogout amoin dann Témoinyaz Krétyin-la. Mi sa ragoul* azot sanm Tikok. Vèy, ou’a oir ! »
Anfin ! In-foi Tikok la kozé, daoir pa mantèr. Moin lé sir-sertin, li sa aminn anou batkaré loin minm dési son "siklotimik".