Tikok lé an troizièm ané desi lo ban katésis. Lo ma-sèr k’i fé katésis po li-la, lé pa tro mové. I sers pa tro l’bout. Eksa, i inm fé ri. I fè k’ Tikok la perd son koté farous-farous épila, dopi dé moi, li mèt ali plito dvan, olèrk fé l’kouyon déryèr ansanm bann Tikarl ek Milien. Lo dé marmay la pa romark rien po rézon Tikok la mont ban par ban firmzir, po pa k band kamarad i moukat ali, i di : « Oté ! ogard Tikok !… li mèt ali dvan. Talèr li tonm dan rob lo prèt ! ».

An parlan d’ prèt, lo ma-sèr té trakasé pars i prétank, déza dan stan-la, navé poin asé d’ prèt, la Rénion po fé la mès. Alors, na in zour, li mazine son bann marmay katésis. Li poz azot ti kestion-la :
« N’y aurait-il pas, parmi vous, quelqu’un qui voudrait se faire prêtre ? »
Na omoin douz garson i lèv lo doi, é Tikok dann ta ! Lo ma-sèr lé kontan, mé an minm-tan li trouv sa drol : tousa dmoun-la po pas prèt ? Lé tro zoli !

Alors, in ot zour, li rodomand lo minm zafèr. S’kou-si, na vin marmay i lèv lo doi. Dé troi kou konmsa, é, sak foi la kantité i rogmant. Desi la fin, kaziman tout lo bann marmay i vé rant prèt ! Alors lo ma-sèr i konpran ke bann marmay l’apo fé in zé ek li, alors li sanz tiktak. Li ariv katésis, li komans domandé :
« Qui voudrait devenir maçon ? ». Dé marmay i lèv lo doi.
« Et agriculteur ? ». Personn !
« Et infirmier ? ». Nèf i lèv lo doi !
« Et instituteur ? ». Kinz marmay i réponn « moi ! »
« Et prêtre ? » alors toudinkou lo masèr i domann.
Asmoman-la, kisa i lèv lo doi ? Tikarl (akoz li té atann pa lo kestion), épi… Tikok (akoz li vé pa fé pas ali po in sarzèr dlo). Sé dopi so zour la ke lo prèt la bos Tikok po pas zanfan-d’kèr.

Christian Fontaine