Tikok l’apo fé manz son bèf dann karo pat-kanar (otroman di : trénas) dann lonbraz filao la Ravine-Divon. An minm tan, li profit po rod inn pongné d’lastron ek pikan. Soman, li fé antansion pangar li ramas zerb-lé ansanm, akoz zerb-lé-la st’in poizon danzéré po lapin !...
Moman doné, Tikok i bit desi in zerb li koné pa ! Zerb-la i rosanm moza, soman lé pa moza1 ! Moza i liane pa konm sa atèr ! Tikok i gèt zerb-la, i di :
« Somanké lé bon po zanimo ! » Li sava po aras in touf, mé oilapak, dèk li tous zerb-la, i amorti ! Li souk in ot ti brans, brans-la i amorti minm ! Tikok i artous ankor in kou, i amorti plis ankor ! A la fin, tout lo pié lé atèr, rokokiyé konm in zanfan i pas aznou pou dmann pardon : “Mi fé pitié monmon, tap p’amoin !”…

“A ! A ! Tikok i di. Ki kalité zerb ankor, sa ?... Saspé na sorsié la-dan !... » Pa-sito mazine sorsié, lespri, zavan, Granmerkal tousala, Tikok i gingn la tranblad ! Li sé-d’ larg son bèf an plan, kouri la kaz, kriyé lasasin :
« Monmon ! Monmon ! Moin la vi in zerb, na l’ diab dédan !... »
Promié débi, Madanm Biganbé i konpran pa aryen. Soman, firmzir Tikok i esplik, el i konpran. Alors el i di ali :
« Ou lé bèt, mon zanfan ! Ou i koné pa sa in zerb i apel tronpe-la-mor, sinonsa sansitiv ? Ot gromèr i fé la tizane ek sa. Sa in zerbaz lé bon po lo nèr… O kontrèr ! Alé aras in pié, m’a fé bouyir ! Pars ou i gingn tro sézisman, koméla ! Pa moyen kontrayé, kapkap lé desi ou, ou i gingn fon-n’sagrin !… Sé l’kèr, la kroisans, tousala ! Mé ot nèr osi, daoir, lé ataké !... »

Christian Fontaine