Dèk la klos la soné, Tikok la fons dan la kour lékol konm volay si grin maï, é tout suit la komans santé : « Vive lé va-kan-se, pa de pé-ni-tanse ! Lé ka-yé o fé, la métrès o milié ! » Ayé-yay, mon Dié Sin-yèr ! Madanm Troufiyon l’antandi, lapèl ali, la di : « Répèt in-peu sa, va, Tikok ! » E pa sito fine kozé, sé d’ trap son bra, pinsé ! Ziska lèr, n’ankor la mark !…

Tikok i inm pi lékol
Pourtan, lé pa Tikok lotèr si li lé dégouté d’lékol ! Promié débi, li té inm, akoz Madanm Tibarik té ankouraz ali : « Travay bien, mon garson ! In zour, somanké ti Bondié nora pitié, ou’ a devnir in mèt- dékol ! » Tikok té aplik minm ! Souvandéfoi li tonm promié pou kalkil konm po dikté… Mé dopik – troi zan aprésa-la bour ali dann Fin-Détid, li konpran pi ali di tou !

Lo mèt i tap
Ek sa, lo mèt lé mésan : i koné rienk tap marmay a kou d’règ si lo doi osinonsa a kou d' poin dan l’koko-d’tèt ! Na in kou, sa la manz in zok dan la tèt Tikok ! La mont in mang pli blé k’in zèf kouvé !…
Po asevé, Granmoune Biganbé l’apo dni fou ek son bitasion : zernion na-pi randman, kann i pèy pi lé fré*, zanimo i krèv ek la maladi… Tou-sa-la i form in traka dan la moral Tikok, i pas ali tro an limazinasion si l’ban lékol…