Sés ke lé arivé, in zour, a lékol. La métrès la fine esplik léson n-soz. Apré sa, el i koz si la « grip aziatik », in lespès movèz pès té i pass dan stan la. A la fin, la métrès i di : « Demain, lo médecin viendra pour la visite médicale. Vous devez apporter un peu d’urine dans un flacon. La métrès la di « d’urine », Tikok la konpri « … du riz » ! Li oua pa bien koman mèt do ri dan in flakon, mé zanfin la métrès la di lé konmsa, alors… !
Domin matin
Anfin, Tikok i ariv la kaz, aprosan katrèr-inkar. Zistoman, son monmon lé apo tri… d’…ri ! Zan-Lik, li, lapo fann do boi loin laba. Tikok i pran minm pa la pène dépoz son sak vakoua, li atak :
« Monmon ! La métrès la di : domin matin, na in doktèr i vien lékol. i fo sak marmay i aport in pé dri po li ! ».
Monmon Tikok i lèv la tèt, i pran son linèt é i mèt si lo bout son né, i rouv son zié gro konm zèf pizon, i di :
« Aport do ri po doktèr ? Akoz ? Ek gro paké larzan li gingn, dokter la lapo krèv la fin, va ! 
– Sépa, moin ! i di Tikok, mé la di aport do ri, bien sir !… dan in flakon ! »
Kan li antann sa, Zan-Lik i rèt koup son boi, i ési son fron ek son mans kabay, i avans é i dmann Tikok :
« la métrès la di : aport do ri ?... dan in flakon ?... po doktèr ?... Mé po koué doktèr, sa ? E, dabor inn, kosa doktèr la i vien fé lékol ? »
Tikok i réponn :
« Li vien fé pas la vizit médikal ! E Madanm Tibarik la tir son fransé, la di : demain, vous devrez apporter un peu du riz !...
Gingn lo zin
Zan-Lik i grat son tèt, i réflési : « Du ri !... flakon… doktèr !... vizit médikal… ». Li kalkil minm : « Du ri… flakon…doktèr » Epi, tou din kou, li fout a rir : « Kouak ! kouak ! kouak ! kouak !… »
Madanm Biganbé i dmann ali :
« Koué i fé rir aou konm sa, Zan-Lik ?
– Monmon ! Tikok la mal konpri ! La di ali : aport in pé d’urine. Sa i vé dir : pisa ! I analiz out pisa, po ouar si ou lé pa malad ! Tou lé zan, nou té fé sa lékol ! Kouak ! kouak ! kouak ! kouak !… »
Zan-Lik, a tèr po rir ! Li moukat minm son pov ti frèr !... Mé, Tikok i bann pa apré li. Li lé kami, li la ont, mé li minm li la anvi d’ rir d’ sa kouyonis ! Alors !... Mé soman, li di dan son kèr : « métrès lèkol, ek bann zorey, i pé pa dir « pisa » konm tout mounn, zot ? Olerk fé gingn amoin lo zin konmsa ! »
Aprésa, po la pinn, li sava, li pran in gran bokal, li pis tanksétasé, omoin in démi lit… « d’urine » !

Christian Fontaine