Na in ti zé la Rénion, tout bann marmay i inm zoué. Tipol, par ékzanp i poz la kestion :
« Ou i manz karanbol, ou ?
– Oui ! Grozil i réponn alors.
– Bin, kaka dann bol ! » Tipol i arvir.
Po pistas, i fé la minm soz, i di :
« Ou i manz pistas, ou ?
– Oui !
– Bin, pis dan la tas !… »

Soman, desi so kestion pistas-la, Tikok, na in kou, lé pa « dan la tas » li la pisé : mé dan son… kilot !...
Na in zour, Tikok té la kaz son matant ek son monmon. Lé dé fanm la po kozé, dann salon, in pé desi tout zafèr : la sésrès lé for, robiné la fontinn i koul fèb, la plantasion i pous pi, marsandiz i rogmant… Pandan stan-la, lo zié Tikok i flanm desi in zafèr déor : in ta pistas son matant la mèt o soley po fé séké. La bous Tikok i fé dlo, si telman li vé gout pistas-la ! Sinploman, son monmon ek son matant i fini pi kozé, é Tikok i tien pi an plas desi son tabouré !...

Momandoné, Madanm Biganbé i lèv po partir.
« Lé ankor d’ bonèr ! » matant Bert i fé.
– A oui, monmon, Tikok i rovir, moin n’ankor mon manzé po mèt o fé, moin la ! »
Soman, kan i ariv déor, lé dé i koz ankor :
« Ou i di ki mank lo, Bert, mé vo flèr lé zoli, pouatan ! Vi aroz, daoir !... Akoz ou i donn pa moin in bouké po port desi la tonm défint Tisia ?
– Pran, ma fi ! Gel-dé-lou, flok, zerbra… lé pa sa k’i mank ! »…

Madanm Biganbé i sava alors ramas son flèr. E sé la k Tikok i anprofit po zoué son rol ! Kan lo do lé dé fanm lé viré, li sava, li pran dé bonn pongné pistas. Mé, konm son kilot gabardine na poin pos ni dvan ni deryèr, li trap lé pistas li fou sou son… sapo, é son sapo li armèt desi son tèt ! Apréla, li sif : « Ffui… ffui…ffui… », konm si rien-nété !... Kan Madanm Biganbé la fine ramas son bouké flèr, el i di rovoir tant Bert :
« Alé, Bert ! Mi di pa mersi, pangar mi gingn arpi la prosinn foi !...
– Kontrèr, rasazi pa », i réponn la matant.
« Alé, Tikok, i di Madanm Biganbé, anbras tant Bert po alé ! »…

Mé, oila pak, dèk Tikok i sava po anbras son matant, in rafal do van i ariv, i savir son sapo ! E « vlap ! », lé pistas atèr, fané partou !... Ayayay, Mondié Ségnèr ! Zot i pé konèt lé dézagréman Tikok-la la gingné ! San konté la dékoksion gramoune Biganbé la donn ali, kan lariv la kaz !... Mi pé asir azot, ziskalèr, kan Tikok i oi pistas, i mazine sa, é lanvi d’ volé i pran pi ali !... Lanvi d’ pis dan la tas non pli !...

Christian Fontaine