Sové Tikok té rouz. Avaz* ali : « volkan », « flanboiyan », osinonsa, « Bouldofé », li di pa arien. Kontrèr, li rir minm ek ou ! Bé mounoir ! Di pa ou la annarg* in moun li yinm !

Na in kou konmsa, Tikok i sa la boutik. Ariv koté la fontinn Troi-somin, li oi Tétin apo avaz gramoun Batok. Tétin i kri : « Oté Batok la rak ! Oté Batok la mori ! »

Gramoun Batok-la sa in vyé gramoun Tikok i yinm bien : souvandéfoi, li sava son kaz po antann ali rakont zistoir « Tizan la vol la mori ». Tazantan osi, vyé Batok i èd papa Tikok vann zournal « Témoinyaz ».

Alors – po arvni si nout konversasion – kan Tikok la vi Tétin gaspi* vyé gramoun-la, son kolèr la monté, li la di apré Tétin : « Ou pa fine avaz gramoun-la ? Lès ali in pé trankil, don ! » Tikok, soman, la koz dousman. Tétin, li, la pran sa antravèr ! Li louk Tikok in kou, son dé ti zyé i flanm konm la brèz dofé ! Li kontant pa zir lo monmon Tikok, li trouv moyin azouté : « Kosa ! Aou zanfan Batok, ou ? Zanfan batar pito, oui ! » Manman ! Pokoué Tétin la di sa ! Lo pé-d'-san Tikok la fé in minm tour ! Marmay-la, la fons si Tétin konm in ti kok-linn*, la moung* sa in maron dann koté lo zyé !

Lannmin matin, papa Tétin, Mésié Edvar, la ni oir gramoun Biganbé. Gramoun Biganbé la kri Tikok. I parté fout ali in volé, soman Tikok la dégaz* rakont tout koman la espasé. Alors, papa Tétin la di : « Si lé konmsa, bon minm po Tétin ! Li navé ka pa avaz domoun, in vyé kamarad konm Batak sirtou ! » Aprésa, li ogard Tikok, li rir, épi li di : « Aou, in marmay, ou'a ni in nonm, ou, si borèr* i manz pa ou ! » La, li rir minm épi Madanm biganbé i aport in koudsèk po boir.